Salah a cham ang - Klopp

Liverpool boss Jurgen Klopp chuan Mohamed Salah contract thar chungchangah hlauhthawnna a neih loh thu a sawi a, Egyptian forward chu Anfield-a a cham ngei a ring.

Klopp chuan, "Mo-a'n cham a duh a, keini pawhin cham turin kan duh. Chu chu kan tun dinhmun a ni a, contract ziak fel tur chuan hun a duh ve bawk a ni," a ti a, Salah hian 2022-23 season tawp thleng Anfield-a cham turin contract a nei.

Kum 29 mi Salah hian Liverpool-ah thil uchuak tak a beisei loh thu a lo sawi tawh a, kar khata £300,000 hlawh phut nia sawi forward hian a hma hun chu Liverpool kutah a innghah thu a sawi bawk.

Klopp chuan, "Kan dinhmun a ṭha a, media ho angin fans pawhin an hlauthawng lo. Engkim tluang takin a kal a, hlauhthawn tur a awm lo a, a cham ngei ka ring," a ti.

Kum 2017-a AS Roma aṭanga Liverpool zawmtu Salah hian match 229-ah Reds tan goal 148 a khung tawh a, Champions League leh Premier League-ah a champion pui tawh bawk.