ISL hmahruaitu Kerala Blasters

Indian Super League khelh mek a ngaihnawm chho zel a, hma an inhruai chhawk zak zak - Kerala Blasters chuan Nilaini zan khan 2-0 in Odisha an hneh a, ISL table chung ber an luah leh ta.

Blasters tan Nishu Kumar leh Harmanjot Khabra ten first half chhungin goal khat ve ve an khung a, Mizo player tamna Odisha-in a chhanletna tur goal an nei thei lo.

Odisha tan Jerry Mawi-hmingthanga chuan goal khungna remchang nei mah se a hun ṭha neih hi a chhawr thei lo a, Chanmari tlangval bakah hian defender Lalruatthara leh midfielder Isaac Vanmalsawma te chuan Odisha tan inkhel bul an ṭan.

Bench aṭangin Kolasib tlangval Paul Ramfangzauva leh Sebastian Thangmuansang te chu luhtir an ni bawk a, an team tan danglamna erawh an thlen thei lo.

Blasters tan ṭum dang ang bawkin K. Lalṭhathanga chuan inkhel bul a ṭan a, a team tan a thawhhlawk chhunzawm zel.

Zanin dar 7:30-ah inkhel pakhat a awm dawn a, FC Goa leh NorthEast United an intawng dawn - team pahnih inkhel tur hian danglamna tak a nei a, Indian coach enkawl ve ve an ni.

Goan club hi Indian coach tawnhriat nei ṭha Derrick Pereira enkawl an ni a, Mahindra United vanglaia enkawltu coach hian match li a kaihhruai tawhah vawi khat hnehna a chanpui a, vawi hnih inhnehtawk neiin vawi khat a tlawmpui thung.

NorthEast United erawh I League-a Aizawl FC champion puitu Khalid Jamil-a enkawl an ni a, season hmasaa playoff hruai thlengtu coach hnuaiah an beisei ang erawhin an la ropui lo - match 10 khelh tawhah vawi hnih chiah an la chak!

Hetihrual hian NorthEast-in team pahnih chiah an hneh zinga pakhat zawk chu Goa an ni a, hetihlaia Goa enkawltu erawh ATK Mohun Bagan coach ni ta Juan Ferrando a ni thung.

January 12, Nilaini Zan
Odisha 0 - 2 Kerala Blasters
KEB: Nishu Kumar 28'; Harmanjot Khabra 40'

Zanin Inkhel Tur
FC Goa 7:30 PM NorthEast United