AFCON nge nge! Thil mak danglam a thleng
Nilaini zan khan AFCON khelh chhunzawm a ni a, result aia sawi hlawh zawk erawh Mali leh Tunisia inkhelh laia thil thleng chu a ni.
Mali hian 1-0 in Tunisia lakah hian hnehna an chang. Mahse, he inkhelah hian referee Janny Sikazwe chuan minute 85-naah inkhel a titawp a, a tihsual avangin an inkhelh chhunzawm leh!
Sikazwe hian a tidik tawh dawn emaw tih laiin minute 89 leh second 47-naah inkhel a titawp leh a, a hun hmaa inkhel a tihtawp avang hian Tunisia coaching staff lamin an bawr nasa hle.
Mali manager Mohamed Magassouba-a'n post-match press conference a neih laiin tournament organiser lamin inkhel chhunzawm turin an ti leh a, mahse, Tunisia lam an inlan duh ta lo.
Buaina ral lian
World Cup 2018-a group stage match hnih hial ham phak Sikazwe-a'n AFCON atan inpuahchahna a nei chhia a ni mai thei - minute nga a la awmin a sana a en lo a, inkhel tawpna hamrik a ham ringawt!
A tifuh tawh dawn emaw tih laiin minute 90 nih nana second 23 a la awm laiin a ham tawp a, vawi hnih ngawt video assistant referee a rawn avang leh tui inchawlh a pek bawk avangin additional time pe ngei tura ngaih a ni a, pek chu sawi loh, a titawp hma zawk.
Tunisia coach Mondher Kebaier chuan, "Referee chet dan kha sawifiah theih a ni lo a, engtiangin nge thutlukna a siam ka hre lo a, engtinnge an tih zel dawn chu kan hria ang," a ti a, "Kum 30 football-a hun ka hman chhungin hetiang thil hi ka la hmu ngai lo," a ti!
Mali coach Magassouba chuan, "Khelmualah kir leh turin min hrilh a, mahse, vanduaithlak takin Tunisia lam an rawn let ve tawh lo," a ti a, Kebaier chuan, "Ka player-ten ice-bath an nei daih tawh," tiin an tan kirna chi a nih tawh loh thu a sawi.
Team vannei Mali
Mali tan Ibrahima Kone chuan minute 48-naah penalty aṭangin inkhela goal awmchhun a khung a, Tunisian midfielder Ellyes Skhiri-a kut chu goal shot-in a per avangin penalty hi an hmu.
Tunisia tan Wahbi Khazri chuan penalty hmang vekin si phurh sutna remchang nei mahse, Ligue 1 club Saint-Étienne attacking midfielder penalty pet ṭha tak chu Mali keeper Ibrahim Mounkoro chuan a dansak.
Mali substitute El Bilal Toure chu minute 87-naa Tunisia defender Dylan Bronn ke rek a man avangin hnawhchhuah a ni a, penalty pet goal lo Tunisia-in beiseina thar an nei.
Mahse, referee-in hun tawp hmain inkhel a titawp a, hun pek belh pawh a awm theih tak loh avangin Tunisia tan a tam zawk nih chhawrna hun a awm thei lo.
Ivory Coast chak
Nilaini zana AFCON inkhel result ngaihven hlawh zual zingah Ivory Coast chuan 1-0 in Equatorial Guinea an hneh a, inkhela goal awmchhun hi Turkish club Sivasspor forward Max Gradel-a'n a khung a ni.
Goal an chhuah danah Equatorial Guinea an lawm lo a, goal an chhuah hma hian an attacking midfielder Jose Machin lakah foul-a awmah an ngai.
Mahse, referee-in mual sir monitor-ah a thutlukna a en nawn a, a thutlukna a sut lo - Iban Salvador chuan Equatorial Guinea tan si phurh sutna remchang nei mah se holam takin a hlah!
AFCON-a a vawi khat nana inlan Gambia pawhin hnehna an chang a, minute 10-na leka Ablie Jallow goal khung hmangin Mauritania chu 1-0 in an hneh - Jallow hi Belgian top division club Seraing-ah Ligue 1 club Metz aṭangin loan-in a khel mek.
January 12, Nilaini Zan
Tunisia 0 - 1 Mali
MAL: Ibrahima Kone 48' (P)
Mauritania 0 - 1 Gambia
GAM: Ablie Jallow 10'
Equatorial Guinea 0 - 1 Ivory Coast
IVC: Max Gradel 5'
Zanin Inkhel Tur
Senegal 06:30 PM Guinea
Malawi 09:30 PM Zimbabwe
Morocco 09:30 PM Comoros
Gabon 12:30 AM Ghana