Inter Milan kutah Italian Super Cup
Serie A champion leh Coppa Italia champion ten an inchuh ṭhin Italian Super Cup chu Inter Milan kutah a awm. Inter hian Juventus chu hun tawp dawna Alexis Sanchez goal hmangin 2-1 in an hneh a, kum 2010 hnua a vawi khat nan an champion.
Nilaini zan San Siro-a inkhelah Old Lady lamin Weston McKennie hmangin goal an nei hmasa, penalty aṭanga Lautaro Martinez-a'n sutin hun pangngaiah goal dang a lut lo. Extra time zawh dawnah Sanchez inlarin chakna goal a khung.
Dinhmun inang lo
Inter Milan lamin hliam leh hrem vanga player chhawr theih loh an nei lo, manager Simone Inzaghi-a'n an ṭhat theih dan berin a naute a rem thei - Inter manager a nih china a nomawi hmasa ber chawi theihna remchang a nih avangin thapui a thawh.
Juventus erawhin hrem vangin Matthijs de Ligt leh Juan Cuadrado te an chhawr thei lo, hrem ngaia an awm erawh chhuanlama hman chi a ni lo ang. Chutih rualin an hmatawng pawimawh Federico Chiesa chu a khup hliam vangin a inlan lo a, tun season chhungin a inlan tawh lo mai thei.
Keeper Wojciech Szczesny-a'n Covid-19 vaccine a lak tlai avangin a chhawr theih loh, midfielder Aaron Ramsey leh Dabilo te an hliam bakah defender Leonardo Bonucci chu 100% fit a nih loh avangin chhawr ngam a la ni lo.
Inter an chak
A lawm hmasa zawk chu mikhual Juventus an ni. Minute 25-naah Alvaro Morata siamsak chu hnai takah Weston McKennie-a'n a tauh lut, harsa taka ball siam chhuaktu Spanish striker in fak a phu, a hnua hun ṭha a neih erawh a hlah.
Boruak ṭha zawk Inter an zam duh bik lo, striker Edin Dzeko-a penalty hlawh chhuah chu Martinez chuan chiang zeta khungin si phurh a sut a, hun pangngai an khelh zawh thlengin goal dang a lut lo, extra time khelh a ngai.
Extra time pawh a zo hman ṭep, minute 120+1-ah substitute Alexis Sanchez chuan defender Alex Sandro-a ball dan fuh tawk lo nangchingin chakna goal a khung a, mikhual team tan sut lehna hun a awm tawh lo - an mualah Inter an champion.
A vawi thumna
Antonio Conte leh Romelu Lukaku ten season hmasa khan Inter hi Serie A nomawi an chawi pui, mahse nipui laiin Nerazzurri hi an chhuahsan daih. Inter hi sum leh paiah an buai zui a, manager thar Inzaghi tan hna thawh a châkawm viau lo ang tih a rin theih.
Mahse, Italian manager hian rei vak loah Inter hi a siamrem thei mai a, tunah chuan hlawhtlinna a chang der tawh. Lazio a enkawl laiin Super Cup hi vawi hnih a lo chawi tawh a, tunah chuan a nomawi pathumna a hlawh chhuak.
Manager Inzaghi tan Super Cup pathumna a nih laiin Inter Milan tan erawh vawi ruk an champion tlinna a ni chiah a, an chesual viau a nih ngawt loh chuan season tharah pawh Super Cup hi an khel phak leh ngei tura rin a ni.
Inngaitlawm
Hnehna chang mah se Inter Milan manager a inngaitlawm hle. Inzaghi chuan, "Juve hi team ṭha tak an ni a, chutih rualin goal khung theihna remchang an insiam hleithei lo, a awmzia chu ka naute an khel ṭha hle tihna a ni," tiin a naute a chhuang hle.
Inter hi Chinese sumdawng hausa ta a ni a, tun ṭuma an inkhel en tur hian club president Steven Zhang chu a hmunah a kal. A player ten nomawi an hlawh chhuahsa chu khelmualah chawi ve in a hmelah a lungawi hle tih a lang.
Inzaghi chuan, "A hlim hle, club neitu lam tan chuan nomawi aia hlu a awm thei tawh bik chuang lo ang. Player-ten an lungawina tur ngeia hna an thawhsak avangin kei pawh ka lawm hle, president hnen aṭang pawhin lawmthu sawina kan dawng," a ti.
Football nunrawng
Hun tawp hma second nga vel chauh a awmah Juventus lamin goal an chhuah a, uiawm takin Super Cup chu Inter Milan lakah an kaltir a ngai. Old Lady manager Massimiliano Allegri chuan football chu a changin a nungrawng ṭhin hle tih a sawi.
Allegri chuan, "Eng ang taka ṭha nge kan ni tih fiahna ṭha tak a ni, ṭha takin khel mah ila football nunrawnna kan chunga a thlen ni a ni miau si. Hamrik hnuhnung ber a rik hma chuan tihsual neih zeuh a pawi tih a takin kan hmu," a ti.
Juventus hian season kal laiah beisei an phak lo. Super Cup an kawl lai an hloh phawt, league lamah pawh hmahruaitu Inter Milan an phak lohna chu point 11 ngawt a ni a, season chanve chauh an la hmang chungin an inkar a zau tawh hle - an mualphona hi season chawhnu lamah thup an tum ang.