A thiam pariat zingah Sindhu

Badminton inelna Indian Open khelh laiah PV Sindhu chuan quarterfinal a inhlangkai a, nimina inkhel dangah world number 1 hlui ve tho Saina Nehwal erawh chak loin second round-ah a zinkawng a tawp.

KD Jadhav Indoor Hall, New Delhi-a inkhelah Sindhu hian kum 22 mi Ira Sharma chu 21-10, 21-10 in a hneh, hnehna chang tur hian minute 30 bak hun a mamawh lo. A match lehpekah chuan Yaelle Hoyaux 21-17, 21-14 a hnehtu Ashmita Chaliha a hmachhawn leh ang.

Inkhel dangah Saina chuan Malvika Bansod a hmachhawn a, minute 35 an inkhelh hnuah London Olympic bronze medalist hi 21-17, 21-9 in a chak lo; player pahnih an intawn tawhnaah Saina hi a vawi khat chak lohna a ni.

Hripui lengin Indian Open pawh a nghawng. Badminton World Federation (BWF) chuan hri leng kai vangin player pasarih an inkhelh chhunzawm theih loh tur an tarlang a, an zingah hian Kidambi Srikanth pawh a tel.

Srikanth bakah hian Ashwini Ponnappa, Ritika Rahul Thakar, Treesa Jolly, Mithun Manjunath, Simran Aman Singh leh Khushi Gupta te chu loh theih lohna vanga inhnukdawkte an ni.