Newcastle-in Chris Wood an lalut

Newcastle United chuan Burnley aṭangin striker Chris Wood chu pound maktaduai 25-in an lalut. Kum 30 mi New Zealand striker hian 2023-24 season thleng St James' Park-a cham turin contract a ziak.

Magpies-in Wood an lakluh chhan hi an striker Callum Wilson inhliam vang a ni a, Wilson hi chawn hliam vangin kar riat chhung a chawl dawn. January transfer-ah Newcastle hian Wood hma hian Atletico Madrid aṭangin Kieran Trippier an lalut tawh a ni.

Newcastle player thar Wood chuan, "Newcastle United player ka ni hi ka lawm a, chona hmachhawn a châkawm tawh hle. St James' Park-ah hian ka inkhel ve nual tawh a, a boruak a ropui ṭhin hle," tiin a sawi.

Kum 30 mi Wood hian Championship-ah Leicester City leh Leeds United tan hming a chher tawh a, kum 2017 khan Burnley history-a player man to ber ni turin pound maktaduai 15-in Leeds aṭangin a zawm.

Premier League-ah pawh Wood hian hming a chher a, season li a khelh tawhah goal 10 a khung tling vek a, tun season-ah erawh goal thum chauh a la khung.

English manager Eddie Howe chuan, "Hun pawimawhah Chris kan lalut thei hi a lawmawm a, hun rei lote chhunga kan tifel thei hi a lawmawmna belhchhahtu a ni. Goal hmaah a hlauhawm a, thahrui a ngah a, a rilru put hmang a dik a, Premier League-ah tawnhriat a nei ṭha. Newcastle nen an inkawp rem thlap," tiin an player thar lakah a lungawi thu a sawi.

Magpies hian January 15, Inrinni zan hian Watford an hmachhawn dawn a, St James' Park-a inkhel turah hian Wood hi a inlan a beiseiawm hle.