Bulls lakah Nets an chak

NBA Eastern Confe-rence lama team ṭha pahnih Brooklyn Nets leh Chicago Bulls an intawng a, player hrawl nei tam zawk Nets lamin 138-112 in hnehna an chang a, chak lo mah se Bulls hi table hmahruaitu an ni chhunzawm.

Brooklyn Nets tan hian Kevin Durant-a'n point 27 a nei a, amah ang bawka star player James Harden chuan point 25 a nei bawk. Team pahnih an inkhel tawk viau a, mahse quarter thumna leh lina tir lamah Nets hi 22-0 ngawtin an kal fal thei a, an chak theih phah a ni.

Harden chuan, "Tun hnai kan match hnuhnung 10 chu hriatthiam a harsa khawp mai, kan khelh fuh leh fuh loh ni inkar a zau lutuk a ni. Tun ṭumah hian team ṭha kan hneh thei tih kan lantir a, kan khelh ṭhat chhunzawm ka beisei," tiin a sawi.

Season hmasa khan Nets hian Durant, Harden leh Kyrie Irving te a rualin an chhawr hleithei lo. Season kal laiah pawh player ṭha pathum hi a ruala an inlan vawi hnihna chauh a ni a, an inkawp rem a nih chuan NBA champion nih an tum ngam dawn.

NBA regular season kal laiah Nets hi vawi 26 an chak tlinna chiah a ni a, ṭum 14 an tlawm tawh thung. Eastern Conference hmahruaitu Bulls hi vawi 27 chak tawhin Nets chungah an la awm chhunzawm - an inelna chhunzawm zel dawn tih a chiang.

Nimin zing inkhel dangah Los Angeles Lakers chu Sacramento Kings lakah 125-116 in an chak lo. Lakers tana LeBron James-a point 34 neihin awmzia a nei phak lo a, team thawhhona ṭhaa innghat Kings lam an chungnung ta zawk.

NBA - Nimin Results
Boston Celtics 119 - 100 Indiana Pacers
Dallas Mavericks 85 - 108 New York Knicks
Los Angeles Lakers 116 - 125 Sacramento Kings
Charlotte Hornets 109 - 98 Philadelphia 76ers
Houston Rockets 128 - 124 San Antonio Spurs
Orlando Magic 106 - 112 Washington Wizards
Cleveland Cavaliers 111 - 91 Utah Jazz
Miami Heat 115 - 91 Atlanta Hawks
Brooklyn Nets 138 - 112 Chiaco Bulls