Bowen-a'n West Ham a chakpui

Nilaini zan Premier League inkhelah West Ham United-in Norwich 2-0 in an hneh a, goal hnih hi Jarrod Bowen khung a ni. Hammers manager David Moyes chuan inkhelh banah Bowen tan England tana khelh a hnaih phah sawt thu a sawi.

West Ham hian hnehna an chan avangin match 21 aṭangin point 37 an hmu a, Arsenal chungah invawrh chhoin palinaah an awm. Norwich City erawh table mawngphahah an la awm chhunzawm a, match 20 aṭangin point 10 chauh an la hmu a ni.

Bowen-a show
West Ham United an khel ṭha a, kum 25 mi Bowen a langsar. West Ham-in chance an neih apiangin Bowen hi a lang ve zel a, Hull City aṭanga Hammers zawmtu Bowen hian a chance ṭha neih hmasak chu ṭha zetin a ke vei lamin goal-ah pet mah se keeper Tim Krul-a'n a dansak.

Minute 42-naah Bowen hian goal a khung ta tho a, dinglam aṭanga Vladimir Coufal cross chu Bowen hian a tauh lut. Second half-ah Michail Antonio-a'n hun ṭha a hlah a, English striker hian a hnunga awm Bowen hi pe se a goal thei hial ang. Bowen bawk hian Pablo Fornals pass ṭha bik chu la lutin crossbar a pet per.

Minute 83-naah Bowen hian Arthur Masuaku cross chu goal-ah a chantir a, assistant referee-in offside-ah ngai mah se VAR hmanga ennawn hnuah goal-ah pawm a ni. Hammers-in hnehna chan an phu a, chutihrualin 1-0 a nih laiin Norwich midfielder Adam Idah ball pet chu Lukasz Fabianski-a'n a dan hnuah goal ban a per a, goal-ah lut lo - lut se chuan inkhel result a dang thei hial ang.

Tla tur Norwich?
Norwich City-in result ṭha an neih theih loh avangin November 6 khan manager Daniel Farke an ban a, Aston Villa ban zawh chiah Dean Smith chu November 6 khan an lalut. Smith-a hnuaia match hmasa paliah hneh loh tawng loin vawi hnih an chak a, vawi khat an inhnehtawk.

Tunah erawh Farke enkawl Norwich ang tho khan chak loh ngaiah an nei ang hiala ngaih theih turin league match hnuhnung parukah an chak lo vek. Canaries hian match 20 zawhah point 10 chiah an hmu a, Premier League history-ah match 20-a point 10 aia tlem hmu chu club paruk chiah an awm.

Norwich hi table mawngphahah an awm mek a, goal khung an harsat bakah goal an chhuah nasat avangin 20-naa an awm hi a mak lo. Canaries hian goal riat chiah an la khung a, striker Teemu Pukki-a'n goal nga khung tawhin goal dang zawng hi player pathum khung a ni a, player pali chiahin goal an la khung tihna a ni.