Three Lions-in goal thum an khung

UEFA Nations League khel tura an inpuahchahnaa chak turin England-in harsatna an tawk lo a, an mikhual Republic of Ireland chu friendly match-ah 3-0 in an sawp. 

England tan captain armband hrengtu Harry Maguire chuan minute 18-naah goal hmahruai a khung a, Jadon Sancho leh Dominic Calvert-Lewin (penalty) te chuan goal an khung ve bawk. 

Arsenal rawlthar duhawm Bukayo Saka chuan England tan inkhel bul a ṭan a, Everton striker Calvert-Lewin penalty hi a hlawhchhuah a ni - England-in kum 1985 hnua a vawi khat nan Ireland an hneh. 

England tan Jude Bellingham chu second half-ah luhtir a ni a, Borussia Dortmund rawlthar hi England senior team tana inlan thei naupang pathumna a ni - kum 17 leh ni 137 mi a ni. 

Manchester United goalkeeper Dean Henderson pawhin ram tana a match hmasa ber a khel a, Red Devils first choice ni phak lo keeper hi second half-ah Nick Pope thlakin a tlan lut. 

Aston Villa captain Jack Grealish chu England tan player hmuhnawm bik a ni a, United fan-te chil a ti put thar leh ngeiin a rinawm. 

Three Lions hian Pathianni zan dar 1:15-ah Nations League match an khelh chhunzawm dawn a, khualmualah team ṭha Belgium an lenchilh ang - Wembley-a an intawn hmasakah 2-1 in England hi an chak tawh.