Zaninah Premier League inkhel pawimawh Manchester City vs Chelsea

Zanin dar 6:00 hian Etihad Stadium-ah Manchester City-in Chelsea an mikhual dawn. Premier League champion lai Man City hi champion nawn turin an dinhmun a ṭha a, Chelsea tan nomawi beiseina nei chhunzawm turin chak ngei a ngai thung.

Pep Guardiola hote hian match 21 aṭangin point 53 an hmu a, khelh zat inangah Blues aiin point 10 in an hmu tam zawk. Thomas Tuchel-a hote hi Liverpool nen Man City elpui thei tura ngaih a ni a, league nomawi chawi turin Chelsea hi an ṭha tawk em tih chu zanin hian fiahin a awm ang.

Pep vs Tuchel
Nikum January thla khan Thomas Tuchel-a'n Chelsea awm chauh mah se Manchester City hi ṭum li a hmachhawn der tawh. Season liam ta bikah German manager hote hian Man City hi ṭum thum an hneh.

Premier League, FA Cup semifinal leh Champions League final-ah Tuchel-a hote hian Man City hi an hneh vek a, German manager hian Pep Guardiola a ngam viauin a lang hman. Amaherawhchu tun season-ah Pep-a'n a theihna a rawn lantir a, nikum September 25 khan Stamford Bridge luhchhuahin Gabriel Jesus-a'n goal awmchhun a khung.

Blues hian Man City an hneh loh zawhah pakhatna aṭangin pahnihnaah tla zeuh mah se insiamṭhain pakhatna an ni lehnghal. Nikum kum tawp lamah Blues an chesual a, point a hloh hnem laiin Man City-in dinhmun an siam ṭha a, January thla laihawlah meuh chuan Pep-a hote hi point 10 ngawtin an sang tawh.

Champion tur City?
Man City hian November thla aṭang khan an khingpui an la hneh vek a, match 11 aṭanga point 33 an hmu thei hian an ṭhatzia pholang. Player ṭha chungchuang Kevin de Bruyne-a'n a thiam thil a lantir leh ṭan tawh a, Man City ṭha tawh sa an ṭhat belh sawt.

Spanish midfielder Rodri-a'n midfield lai a luahlum ṭha a, Pep Guardiola-a'n player ṭha rual thiam taka a rem khawm avangin hneh theih loh ang mai niin an lang hial. Man City hi striker pangngai nei lo tih tein sawisel ṭhin bawk mah se Etihad Stadium-a league match tinah chawhrualin goal thum an khung phak a, goal khung an harsat phah lo.

Amaherawhchu Pep-a Man City meuh pawh an famkim lo. League match hnuhnung berah Arsenal 2-1 in an hneh hram a, injury time-ah chakna goal an khung chauh bakah referee duhsakna an dawng tel bawk.

Tun hnaiah Covid-19 hri lengin Man City a ti buai a, FA Cup-a Swindon Town an hneh ṭum pawhin Pep-a'n team a ho thei lo. Chelsea an hmachhawn hunah Spanish manager hi awm tawh turah ngaih ni mah se Phil Foden leh Oleksandr Zinchenko te chu Covid-19 vangin chhawr theih an ni lo ang.

Chelsea lam hi
Man City-in AFCON vangin Riyad Mahrez an chhawr thei lo a, Chelsea-in keeper Edouard Mendy an hmang thei dawn lo. Amaherawhchu Blues hian League Cup-ah Kepa Arrizabalaga an chhawr a, Tottenham lakah khawvel keeper manto ber Kepa hi a che ṭha.

Spurs an hmachhawn ṭum hian Covid-19 kaihhnawiha tel Thiago Silva leh N'Golo Kante te an rawn kir leh tawh a, tawnhriat nei plyaer hi team ṭha Man City lakah an ṭangkai ang.

Chelsea hian League Cup semifinal-ah 3-0 ngawtin Spurs an hneh a, second leg inkhel chawhnu lamah Tottenham-in chance an ngah avangin Tuchel-a lawm erawh a kim lo. German manager chuan, "Kan ngaihtuah tawk loh vangin hremin kan awm teuh hle. Kan theihna 90% in kan khel a, chu chu kan kalphung a ni lo," tiin a sawi a, Man City lakah insiamṭhat an tum ang.

Tlarhma lamah Romelu Lukaku a rintlak leh tawh a, Belgian striker hi a ṭawng tam vanga hrem a tawh hnuah a inlamlet a, rinrawl a ni leh tawh. Etihad Stadium-a point thum hlawhchhuak tur chuan Lukaku bakah tlarhmaa awm player Timo Werner, Kai Havertz leh Mason Mason ten an chance neih an hlah loh a ṭul dawn a ni.