Gerrard-a Villa mikhual tur Man United

Manchester United-in FA Cup aṭangin Steven Gerrard-a enkawl Aston Villa an pet chhuak a, zanin dar 11:00 hian Villa Park-ah club pahnih hi an inhmachhawn leh dawn.

Gerrard leh a hote hi Old Trafford-a an chak loh danah an lungawi lo a, phuba lakna remchang a ni thei ang. Villa hian Barcelona aṭangin Philippe Coutinho an lalut fel tawh a, Brazilian midfielder hoa Man United hmachhawn an châk dawn.

Premier Legue inkhel en châkawm zetah hian Aston Villa-in hrem vangin John McGinn an chhawr thei dawn lo a, Man United-in Luke Shaw leh Scott McTominay te hrem vang thoin an hmang thei dawn lo.

Amaherawhchu Ralf Rangnick-a'n FA Cup-a dam chian loh vanga a awltir Cristiano Ronaldo a chhawr theih a beiseiawm. Portuguese forward Ronaldo chuan, "Ka taksa hi ka hrechiang a, ka dam ṭha. Tun hma nen chuan player dang daih ka ni tawh a, mahse chak ka duhna chu a la ngai reng. Team pui tura inkhelh ngei ka duh," tiin inkhel tura a inpeih thu a sawi.

Man United hian kumina league match an khelh awmchhunah Wolves 1-0 in an hneh lo a, German manager Rangnick-a hnuaiah insiamṭhat an mamawh hle. Villa pawhin league match hnuhnung berah Brentford 2-1 in an hneh bik lo.