Djokovic dinhmun a chiang leh lo!

Thu chiang a la awm thei lo, a chiang tawh hnu kha a chiang lo leh zel. Novak Djokovic-a'n Australian Open 2022 a khel thei dawn em tih chu vawiinah a chiang dawn chauh - Grand Slam hi January 17, Thawhṭanni aṭanga khelh ṭan tur a ni dawn.

Australia pan turin visa a hmu a, amaherawhchu a visa hi cancel sak a ni. Court-ah thiam a chan avangin a visa a nung leh a, mahse Australian immigration minister Alex Hawke-a'n nimin khan a cancel sak leh a ni.

Nimin vek khan court-ah an inlan chhunzawm nghal. Djokovic-a dan hremi Nicholas Wood-a'n a ngen angin nimin khan thutlukna siam nghal a ni lo. Court chuan insawifiahna hun a pe a, vawiin hian an thu a ngaichang leh ang.

An cancel
Dan chu dan hmang veka ṭhiah emaw her danglam a ngai ṭhin. Djokovic-a visa chungchangah pawh vawi hnih ngawt court-ah an lut ta. Court a awm miau avangin sorkar thuneitu lam pawhin an duh duh danin thil an ti kal ngawt thei bik lo.

Australian Prime Minister Scott Morrison chuan, "Novak Djokovic-a visa cancel chhan chu hriselna lam thil vang a ni. Kan ram hian hripui len laiin thil harsa tam tak kan hmachhawn a, kan him theih nan kan inpumpek. Chuvangin minister pawhin hma a la a ni," tiin a sawi.

Minister thu anga visa hi an cancel tlang a nih chuan Novak tan a pawi thui dawn, kum thum chhung Australia ramah a lut thei dawn lo. Serbian star hi tunah kum 34 mi a nih tawh avangin sorkar thu anga an kaltlang a nih chuan atan Australian Open a tawp anga sawi theih a ni ang.

Buaithlak
Tennis Australia lamin Djokovic hi tournament hmachhawn turin a chiangah an ngai a, seeded pakhatna an pek bakah fixture pawh an siam fel vek tawh. Ningani khelh inelna an khelh chhoh dan pawh siam fel a ni a, an tar chhuak vek tawh.

Draw an neih hnuah visa cancel sak a ni leh si a, a thubuai hi a la tawp loh avangin nizan thleng kha chuan tournament buatsaihtu lam pawhin Djokovic a hmun hi a ruak dawn nge a ngai anga kaltlangpui tur a nih dawn an la ti chiang thei bik lo.

Serbian star Djokovic hian remchang a hmuh ang chuan training a nei ṭhin. Mahse, a chunga thil thleng avang hian kum danga tournament a khelh boruak ang chu a ni thei dawn lo tih a chiang tawh a, a inlan thei hrim hrim a nih pawhin atan lawmna tur a ni tawh ang.

Australian Open leh Djokovic
2021 November 18: Novak Djokovic chu Australian Open a khelh theih nan visa pek a ni.
2021 November 29: Australian health minister Greg Hunt chuan Australian Open Tournament Director leh Tennis Australia CEO ni bawk Craig Tiley hnenah an rama lut tur tan Covid-19 vaccine lak ngei a ngaih thu a hrilh.
2021 December 7: Tennis Australia chuan player-te hnenah vaccine lak a ngaih thu leh, vaccine la lo chu taksa hriselna lam thil vang chauha ngaihhnathiam theih an nih thu an hriattir.
2021 December 30: Djokovic-a'n Tennis Australia hnen aṭangin ngaihhnathiamna a dawng. December thla a hripui a kai vanga vaccine la ni loa sawi a ni.
2022 January 2: Djokovic-a team ten Australia sorkar hnenah zin dilna an thehlut a, Victoria state sorkar aṭangin Border Travel Permit a hmu.
2022 January 5: Spain a chhuahsan tukah Melboure a thleng a, mahse a passport laksak niin khung hran nghal a ni bawk. A tukah a visa chu cancel sak nghal a ni.
2022 January 10: Court-ah Djokovic a kal a, a visa an cancel sak tawh hi tih nunsak leh a ni. Mahse, sorkar lam dan hremi chuan an minister-in visa hi a la cancel leh tho tur thu a sawi.
2022 January 14: Australian immigration minister Alex Hawke chuan a thuneihna hmangin Djokovic-a visa hi a cancel sak a, hun tepter takah court lamah an kal chhunzawm leh nghal.
2022 January 15: Djokovic-a dan hremi in a ngen avangin vawiin hian insawifiahna hun a nei dawn, thutlukna an siam nghal tawh bawk ang.
2022 January 17: Australian Open 2022 an khel ṭan ang.