Liverpool leh Arsenal inhnehtawk

Arsenal manager Mikel Arteta chuan player kim lo chunga Liverpool nen an inhnehtawk thei chu lawmawm a tih thu a sawi a, a nauten Carabao Cup semifinal first leg an khelh danah a lungawi.

Ningani zan inkhelah Granit Xhaka chu minute 24-na lekah hnawhchhuah a ni. An inkhelhna hi Anfield a nih bawk avangin Reds chu chak chiang tura ngaih an ni, mahse Gunners hian an goal an venghim tluan thei, 0-0 in an inhnehtawk.

January 20, Ningani zan hian Emirates Stadium-ah second leg khelh a ni dawn, a chak zawk chuan Tottenham Hotspur pet chhuaktu Chelsea nen nomawi an inchuh leh dawn a ni - champion turin kawng a awlsam lo hle.

Red card
Team pahnihin hri leng leh Africa Cup of Nations vangin an player ṭhenkhat an chhawr thei lo ve ve, chhawr tur an neih tawk china ṭha ber chu an thawhchhuahpui; semifinal a nih tawh avangin chak ngei an duh tih a chiang.

Andrew Robertson-a'n hla deuh taka awm Diogo Jota tan ball ṭha tak a pe a, Portugal international hian la tlang thei ni se goal khung theihna hun ṭha a nei ang. Jota ball la tur hi Xhaka chuan a awmah a lo pet a, hnawhchhuah nghal a ni.

Alexander-Arnold-a'n freekick chhuih zuiin a khung lo a, player tlem zawk Arsenal lamin tlarhnung an ngaih pawimawh avangin Reds an che thei bik lo. Mikhual team hian minute 71-naah target zawna pet an nei ve chauh.

Chutihrualin Jurgen Klopp-a naute pawhin hun ṭha insiam an harsat ve tho. Mohamed Salah leh Sadio Mane te tel lo chuan an tlarhma a hriam lo, hun tawp dawna Takumi Minamino-a'n a thlawh over bak chu remchang an insiam hleithei bik lo.

Arteta a lawm
Midfield siksawi a ngai nasa a, an neih ṭhat leh tawnhriat nei tam Xhaka chu hnawhchhuah a ni. Goal khung theihna remchang an neih chhunah Bukayo Saka-a'n keeper Alisson a paltlang thei lo, chak zo lo mah se an result-ah Arteta a lawm.

Arteta chuan, "Team ṭha kan hmachhawn a, dinhmun harsa takah kan ding bawk. Inkhelh ṭan hma khan ka naute hnenah rilru puthmang dik a pawimawh thu ka hrilh a, ka hmuh dan chuan ka sawi ang takin an awm thei.

"Tun ṭum bikah chuan a khelh dan tur dik takin kan khelah ka ngai, second leg kan khelh hunah chuan tun ai hian fans thawm pawh a ṭha zawk tura beisei a ni," a ti a, Anfield-a Gunners fans chet dan a duhkhawp lo deuh a nih hmel.

Ngaih lai Salah
Liverpool hian first leg khelh hun sawn an dil a, khualmuala inkhel hmasa tur kha an khelmualah an inkhelh hmasak a ngaih phah. Inkhelh hun sawn an dil chhan ber kha a hnuah false positive a ni tih hriat chhuah leh hnuhnawh a ni a, a lawmawm lo ang.

Reds hian innghahna bik an nei a, a hming chu Salah a ni. Egypt international forward hian an khelh ṭhat tawk loh niah pawh goal a khung leh mai ṭhin, tun ṭumah chuan Salah hmunruak luah zo an awm lo; Jota leh Roberto Firmino te hi player ṭha ni mah se final third-ah an hriam tawk lo.

Klopp chuan, "Second half-ah kha chuan kan khel ṭha deuh hlek, mahse hnehna chan nan a tawk zo chuang lo. Second leg khelh hmabak kan la nei, tunah hian chawlhlawk kan la hmang mek chauh a ni," tiin khualmuala hnehna chan theih a in beisei.