Hma lam kan pan ang - Klopp

Chak theihna remchang ṭha lutuk an neihah an chak zo lo a, inkhelh banah Jurgen Klopp-a'n zawhna a dawn langsar chu Mohamed Salah, Sadio Mane leh Naby Keita awm lo intuar em? tih a ni.

Liverpool manager Klopp chuan, "Tuar e, kan tuar hle. Hetiang hun a lo thleng dawn tih hi hun rei tak aṭang khan kan hre lawk tawh, hetiang zawhna hi eng vanga dawng reng nge kan nih hi a mak ka ti zawk.

"Arsenal khan an theihna zawng zawngin an khel a, chuvangin 0-0 a ni. Khelmual chhunga kan player lutte kha an ṭha tawk a, match zawng zawnga chak vek theih a nih lohzia kan hmu. Mahse, kan thlen chin aṭang hian hma kan sawn ang," a ti.

Reds hian Premier League khel turin Pathianni zan dar 7:30 hian Brentford an mikhual zui dawn. September thla khan team pahnih hi 3-3 in an lo inhnehtawk tawh a, tun ṭumah pawh hian inkhel hmuhnawm beisei leh ila a sual lo ang.

Klopp-a naute hian league match an khelh hnuhnung pathumah chak ni hmel an hmu lo. Tottenham leh Chelsea nen an inhnehtawk a, Leicester City an ngam lo; hmahruaitu Manchester City an phak lohna point 11 a nih tawh avangin champion tum tan point hloh a thiang tawh dawn lo tihna a ni.