Hmabak North London Derby

Arsenal hian Pathianni zan dar 10:00-ah inkhel hautak an hmachhawn zui nghal dawn. Tottenham Hotspur khelmualah an len luh nghal a ngai dawn, mahse Mikel Arteta chuan Liverpool nen an inhnehtawk hnuah North London Derby an khelh tur hi a chiang lo tih a sawi.

Reds nen an inkhelh dawn hnaiah midfielder Martin Odegaard chu Covid-19 a kai tih hriat chhuah a ni a, tunah hian hri leng, hrem leh Africa Cup of Nations khelh vangin player an chan hnem hle. Keeper chhiar tel lohin inkhel thei player 12 chauh an nei!

Premier League danah chuan team hian inkhel turin player 13-14 bakah goalkeeper an nei a nih chuan match khelh tur a ni. Tun hnaiah team ṭhenkhat chuan bi tuk zat player an nei lo zeuh zeuh a, inkhelh hun sawn hlatsak an ni ṭhin.

Arteta chuan, "Eng match pawh hi sawn thut theih vek a ni, tun hma pawhin inkhelh hun sawn hi a lo thleng fo tawh a, a thleng mek zel bawk. Mahse, kan theih ang angin kan inbuatsaih chhunzawm tur a ni ang.

"Liverpool hma-chhawn tur pawhin player kan nei tlem takzet, mahse kan inkhelh a ngai si. Chhuanlam siam a rem lo a, kan hna a nih miau avangin kan inkhelh a ngai, inkhel khawp kan nei a nih phawt chuan keini lam chuan khelh zel kan duh," tiin a sawi.

An inkhel a nih chuan Arteta-a'n mid-field a phuahchawp a ngai dawn. AFCON khelh vangin Thomas Partey leh Mohamed Elneny an zin a, hri kai Odegaard bakah inhliam Emile Smith Rowe dinhmun a chiang lo. Indaih loh a nat lai takin Xhaka chu hrem a ni, Swiss player hian ngaihdam dil mah se awmzia a awm tam lo hle.

Arsenal hmachhawn tur Tottenham erawhin buaina lian tham lutuk an nei rih lo. Amaherawhchu, Antonio Conte naute hi Chelsea hneh lo hlim an ni a, a bik takin goal khung an harsat avangin an ṭhat lai ber erawh a ni rih bik lo.

Chutihrualin Conte-a'n a enkawl chinah Spurs hi an chesual ṭha duh lo. Gunners hi an hneh a nih chuan match hniha khel tlem zawk chungin an chungah an awm thei dawn, season thara Champions League khelh an duh a nih chuan an hmelma hneh hi a pawimawh.