Semifinal-ah Sindhu leh Lakshya

Indian Open khelh laiah PV Sindhu chuan semifinal a in vaw kai a, mipa singles huangah rawlthar Lakshya Sen pawh a thiam pali zingah a inhlangkai ve bawk - anni pahnih hi India tana medal lak beiseina an ni.

Seeded pakhatna Sindhu hian nimin khan Ashmita Chaliha chu 21-7, 21-18 in a hneh, hnehna chang tur hian minute 36 chauh hun a hmang. Final lut tur chuan Supanida Katethong a hneh leh a ngai dawn.

Thailand nula Katethong hi seeded parukna a ni a, nimina a khingpui tur Yeo Jia Min chu khawsik vangin a inlan thei lo. Inkhelh hah ngai loin a tlang tihna a ni, vawiinah Sindhu nen semifinal hmuhnawm an lantir ang.

Mipa singles lamah Lakshya Sen chu HS Prannoy nen darkar khat an inkhelh hnuah 14-21, 21-9, 21-14 in a chak. Aakarshi Kashyap pawhin seeded pahnihna Busanan Ongbamrungphan hmachhawn thei turin Malvika Bansod chu 21-12, 21-15 in a hneh ve bawk.

Mipa doubles-ah Ishaan Bhatnagar leh Sai Pratheek te ṭangdun chuan an khingpui Ong Yew Sin leh Teo Ee Yi te chu minute 19 chhung lekin 7-21 7-21 in an hneh lo. Mixed doubles lamah Venkat Gaurav Prasad leh Juhi Dewangan te an tla bawk a ni.