Spanish Super Cup Final-a Real hmachhawn tur Bilbao

Athletic Bilbao chuan Spanish Super Cup final khel turin Atletico Madrid chu 2-1 in an hneh a, khawvelin an hmuh châk Madrid derby chu Saudi Arabia-ah kan hmu dawn ta lo.

Atletico Madrid-in Unai Simon 'own goal' hmangin goal hmahruai khung mah se goal dang an khung tawh lo a, Bilbao-in Yeray Alvarez leh Nico Williams hmangin an chhanglet.

Spanish Super Cup semifinal-ah La Liga champion lai Atletico leh Copa del Rey nomawi kawltu Barca an tla a, champion team inelna ni ṭhinah champion team pahnihin final an khel dawn lo!

Pathianni zan dar 12:00-ah Spanish Super Cup final hi khelh a ni dawn a, Barcelona ngamtu Real Madrid leh Bilbao te hian champion nih an inchuh dawn a ni.

Atletico beiseina
King Fahd International Stadium, Riyadh-a inkhelah team pahnihin goal an khung thei lawk lo a, first half-ah goal hmuh tur awm loin chawlhlawk hman a ni - semifinal mah ni se inkhel a dul hle.

Second half-ah erawh thil a danglam thung. Minute 62-naah erawh Atletico an rawn inlar a, French midfielder Thomas Lemar-a corner aṭanga ball kal chu Joao Felix chuan a lo tauh a, goal post a per.

Mahse, Atletico an vannei a, ball-in post a per hnuah Bilbao keeper Unai Simon-a hnung a fuh a, Atletico-in hma an hruai - Felix-a goal khungah pawm ni lo mah se Portuguese forward-in goal a thawk chhuak hi a lawm khawp ang.

Atletico-in chhuahtir an pawi ti lo nia sawi forward hian season a hmang ṭha lo a, inelna hrang hrang match 18 a khelh aṭangin goal thum chiah a la khung a, assist vawi hnih a nei bawk - chak zo lo mah se a goal thawhchhuah hian inrintawkna a pe ngeiin a rinawm.

Hei le Bilbao
Atletico-in a hunah tak goal an khungah an inngai a, mahse, anni aia team chhe zawka ngaih Bilbao an beidawng lo - Spanish champion team lakah chak an beisei ngam a, an beisei ang ngeiin an duh an hmu.

Minute 77-naah Yeray Alvarez chuan corner aṭanga ball kal chu si phurh sutna goal ni turin a tauh lut a, kum 26 mi centre back-in si phurh a sut hnuah Bilbao an phur sawt a, chak an tum.

Atletico goal-ah khawvela keeper class sang ber pawl Jan Oblak a ding hlauh a, Spanish champion an mualpho lo hlauh - Slovenian keeper hian vawi thum vel zet chu save ṭha tak tak a nei a, Atletico an vannei.

Mahse, Oblak meuh pawhin Atletico a chhan theih loh hun a thleng. Minute 81-naah Nico Williams chuan Atletico captain Koke aia zuang sangin goal-ah a tauh a, Oblak-a'n a dang hman lo a, 2-1 in an chak.

Atletico an chuai?
Season hmasa lawkah Atletico-in La Liga nomawi an chawi a, tun season-ah erawh eng ruai an ang thei lo - Spanish Super Cup semifinal-ah Real Madrid leh Barcelona an awm chungin Bilbao an chang a, final an lut thei chuang lo!

La Liga-ah pawh match 20 khel tawhin palina an ni mek a, pangana Real Sociedad nen an point hmuh zat inangin, team talbuai Barca aia an sanna pawh point khat chauh a ni - an nomawi humhim turin thilmak a thlen a ngai tawh.

Vannei takin Champions League round of 16 an lut hram a, Bilbao lakah pawh final luh hram duhin Luis Suárez leh Matheus Cunha te chu bench aṭanga luhtir an ni a, goal an keng tel lo - tun season-a Atletico tana khung hnem ber Suarez hian match 27-ah goal kua chiah a la khung.

Bilbao lakah hian Atletico defender Jose Maria Gimenez chu hun pek belh minute linaah hnawhchhuah a ni a, Uruguayan defender hi Inigo Martinez laka a foul avanga hnawhchhuah a ni.

Unau nauin!
Atletico tana goal khungtu Nico Williams hi kum 19 mi lek a la ni a, bench aṭanga luhtir niin a unaupa Iñaki Williams erawhin tlarhmaah bul a ṭan thung.

Nico chuan, "Ka lung a chhe zawk hial a, hetiang ang hlimna hi tam tak kan tawn ka beisei. Ka unaupa Inaki leh ka nu, hun tawpa min rawn pantute nena he hun kan tawng thei hi ka lawm takzet a ni," a ti.

Spain Under-21 international chuan, "Ka nu chuanin kha goal khung kha ka phu a ni, tih min hrilh. Hun tawpa ka unaupa nena kan inkuah vawng vawng kha ka theihnghilh tawh lo ang," tiin a sawi.

Nico-a u Iñaki hi chu Spanish football-ah chuan hriat a hlawh hle a, Bilbao ṭantute phei chuan an atchilh rawn a ni ber - a unaupa ang thoin Nico hian a hming a rawn chher an beisei ang.

Spanish Super Cup Semifinal
January 12, Nilaini Zan
Barcelona 2-3 Real Madrid
BAR: Luuk de Jong 41'; Ansu Fati 83'
REM: Vinicius Junior 25'; Karim Benzema 72'; Federico Valverde 98'

January 13, Ningani Zan
Atlético Madrid 1 - 2 Athletic Bilbao
ATM: Unai Simón 62' (OG)
ATB: Yeray Alvarez 77'; Nico Williams 81'

January 16, Pathianni Zan - Final
Real Madrid 12:00 AM Athletic Bilbao