Bayern an insiam ṭha thei ang em?

Bayern Munich-in kumina an match hmasa berah Borrusia Mon-chengladbach 2-1 in an hneh lo a, Bundesliga-ah hmahruaitu ni chhun-zawm mah se anmahni hnaih bertu Borussia Dortmund nen an inthlauhna chu point ruk chauh a ni tawh. Zanin dar 8:00 hian Bavarians-in FC Cologne an lenchilh dawn a, insiamṭhat ngei an tum ang.

Julian Nagelsmann-a hoten Gladbach an hneh loh chhan hi Covid-19 in a run vang a ni a, hri leng vang hian midfielder Marcel Sabitzer-a'n full back hna a chelh a, Sven Ulreich-a'n goal a ven bakah Malik Tillman-a'n a vawi khat nan bul a ṭan. Bench-ah teenager rual an awm a, an indaih lo hle. Keeper Ulreich chuan, "Gladbach nen hian Manuel Neuer dam ta se chuan outfield player zingah a khelh hial ka ring" tiin a sawi.

Cologne an hma-chhawn hunah erawh Manuel Neuer, Omar Richards, Corentin Tolisso leh Kingsley Coman te an chhawr theih a beiseiawm a, chutihrualin Dayot Upamecano, Alphonso Davies, Lucas Hernandez, Leroy Sane leh Tanguy Nianzou te erawh an khelh theih a beiseiawm chuang lo.

Tlarhma lamah Robert Lewandowski a dam ṭha a, Thawhṭanni zanah Best FIFA Men's Player sem a nih dawn avangin Polish striker chungah mipui mit a fu ang. Kum 33 mi Lewy hian tun season league match 18-ah goal 20 a khung der tawh a ni.