AFCON last 16 lut hmasa ber Cameroon

Africa Cup of Nations thlengtu Cameroon chu last 16 lut hmasa ber an ni a, Ethiopia chu 4-1 zeta hnehin an match hmasa pahnihah an chak - a hniam berah pathumna ti ṭha pali zingah an tel tawh dawn a, a thiam 16 zingah an tel chiang.

Ethiopia hian Hotessa Dawa hmangin minute lina lekah Cameroon an barakhaih a, goal hmahruai an khung - mahse, mualneitu chhaih kawlhna goal chauh a ni a, an hlim chhung a rei lo hle.

Goal an chhuah aṭanga minute li hnu lawkah Lyon forward Karl Toko Ekambi chuan Cameroon tan si phurh a sut a, chawlhlawk hmain goal dang lut lo mah se Cameroon an hawikir tawh lo.

Saudi club Al-Nassr tana khel Vincent Aboubakar chuan minute 53-na leh 55-naah goal rawn khung ve lehin Cameroon hi 3-1 in hma a hruaipui a, Toko Ekambi chuan minute 67-naah rawn khung lehin a hmawr a rawn bawk - André-Frank Zambo Anguissa leh Collins Fai ten post an tih per bawk.

Cameroon an khel ṭha a, chak an phu - chutihrual chuan Ethiopia-in 4-1 ngawta tlawm chu an phu bik lo. Ethiopian club Coffee S.C tana khel Abubeker Nassir, goal hmahruai khungtu Hotessa leh midfielder Bezabeh Meleyoten goal khungna remchang dang an nei a, an chhawr lo.

Group A inkhel dangah Hassane Bande goal hmangin Burkina Faso chuan 1-0 in Cape Verde an hneh bawk a, team pahnih hian last 16 luh beiseina an la nei ve ve.

January 13, Ningani Zan
Cameroon 4 - 1 Ethiopia
CAM: Karl Toko Ekambi 8'; 67'; Vincent Aboubakar 53', 55'
ETH: Hotessa Dawa 4'
Cabo Verde 0 - 1 Burkina Faso
BUR: Hassane Bande 39'

Zanin Inkhel Tur
Nigeria 09:30 PM Sudan
Guinea-Bissau 12:30 AM Egypt

January 16, Pathianni Zan
Gambia 06:30 PM Mali
Ivory Coast 09:30 PM Sierra Leone
Tunisia 09:30 PM Mauritania
Algeria 12:30 AM Equatorial Guinea