Messi inlan thei dawn lo

Paris Saint-Germain forward Lionel Messi chuan hri leng a kai hnuah a beisei aia a dam chak loh thu a sawi a, zanin dar 1:30-a league match khel tura Brest an mikhual hunah a inlan theih a beiseiawm loh.

Messi chuan, "In hriat ṭheuh angin Covid-19 ka kai ve a, in thu min thawn zozai avangin lawmthu ka sawi a ni. Ka beisei aiin dam var turin hun ka duh rei a, mahse, tunah chuan ngai ka awh leh ṭep tawh e - khelmuala lo kir pawh ka châk tawh hle.

"100% a in fit thei turin training ka nei leh tawh a, chona phurawm tak tak kan hmaah a inchhawp avangin kan inhmuh leh thuai ka beisei," a ti a, he thu hi social media lamah a tarlang a ni.

Kum 34 mi Messi hi an khua, Rosario-a chawlh a hman laiin, tun thlatir khan hri leng a kai a, kar hmasa khan negative result nei leh tawhin, PSG headquarters lamah amahin training a nei ṭhin.

Messi hian a inkhunghran chhungin PSG match hnih chu a khel thei lo a, Krismas chawlh hnuah khan French club tana a khelhpui Angel Di Maria, Gianluigi Donnarumma leh Julian Draxler te chuan hri an lo kai tawh bawk.

PSG hi league-a an match hnuhnung pangaah vawi li chu an khingpui an inhnehtawkpui a, tun hnaiah beisei an phak lo hle - heti chung hian point 11-in hma an la hruai fal tho.

Messi a awm loh chuan Neymar chu hliam vangin a chawl sa a, Kylian Mbappé mawhphurhna a sang sawt dawn tihna a ni. Messi hian Ligue 1 a pan hnuah league match 11 khelin goal khat chiah a la khung a, assist vawi nga a nei thung.

Champions League-ah erawh match nga khelin goal nga a khung a, last 16 a luhpui - February 15 zanah Real Madrid mikhualin last 16 first leg an khel ang.