Giannis hoin Bucks an chak

Giannis Antetokounmpo-a triple-double neih hmangin Milwaukee Bucks chuan Golden State Warriors chu 118-99 in an hneh, tun hnaiah Warriors hi a zawnin vawi hnih an tlawm ta.

Kum 27 mi Giannis hian 30 points, 12 rebounds leh 11 assists a nei a, a zawna vawi hnih an tlawm hnuah NBA champion Bucks chuan chak ni hmel an hmu ve leh ta; ani bakah hian point 23 neitu Khris Middleton leh Bobby Portis (20 points) te an khel ṭha bawk.

Hnehna an chan avangin Buck hian Eastern Conference table lamah an dinhmun an siamṭha zel a, match 27 chak tawhin palina dinhmun an luah. Pathianni zingah Toronto Raptors an hmachhawn chhunzawm leh nghal ang.

Greek tlangval Antetokounmpo chuan, "Champion lai kan ni a, kan inkhelh apianga chak tura beisei kan ni. Chak vek thei lo mah ila tun hnaia kan khelh danah a lungawi thlak," tiin a sawi.

Klay Thompson a lo kir avanga phur zual Warriors erawh an che fuh hleithei lo. Andrew Wiggins (16 points) leh Stephen Curry (12) te chu point nei hnem an ni mai a, point 20 nei tling thei an awm loh avangin a tlawm zawk an ni.

Inkhel dangah Brooklyn Nets chu Oklahoma City Thunder lakah 130-109 in an chak lo. Nets thiampuipa Kevin Durant chu hahchawlh tir a ni a, vaccine lak loh vangin Kyrie Irving chu New York khawpuiah hian a inkhelh ve phal a ni lo.

NBA player zingah vaccine la lo an awm nual, invenna la lote hi an inkhelh tur khawpui thuneitu lamin an phal loh chuan an inlan lo mai ṭhin. Irving pawh hi vaccine a lak loh avangin team ṭhenkhat awmna khawpuiah a inkhel thei lo ṭhin a ni.

NBA - Nimin Results
Denver Nuggets 140 - 108 Portland Trail Blazers
Brooklyn Nets 109 - 130 Oklahoma City Thunder
New Orleans Pelicans 113 - 89 Los Angeles Clippers
Memphis Grizzlies 116 - 108 Minnesota Timberwolves
Memphis Bucks 118 - 99 Golden State Warriors