Smith leh Alvarez an inrem hnai

WBA world super-middleweight champion Callum Smith-a promoter Eddie Hearn chuan a boxer chu Mexican legend Saul 'Canelo' Alvarez nen an inhnek thei dawn hnai niin a sawi. 

Kum 30 mi Smith hian Alvarez hnek duhin thawm a lo nei fo tawh a, Eddie Hearn thusawi hi rin tur a nih chuan a beisei angin boxer awm tawh zinga ṭha ber pawl hi a hmachhawn thei dawn tihna ni. 

Hearn chuan, "Theih-tawp kan chhuah a, tihtur a la awm a, mahse kan inrem hnai tawh hle. December thla tawp lamah chuan inhnek hi a thlen theih kan beisei," a ti a, Canelo chu Mexico-ah a awm avangin duh anga inbiakna a kal chak theih loh thu a sawi bawk. 

Alvarez hi DAZN nena thawk dunin Golden Boy Promotions hnuaiah a awm ṭhin a, mahse tun hnaiah an inhmuhthiam loh avangin pound maktaduai 278 hu contract a neihna DAZN hi a chhuahsan a ni. 

Weight division palia world title hlawh chhuak thei Alvarez hian fight vawi 56-a hmachhawn tawhah vawi 53 hnehna a chang thei a, vawi khat chiah tlawmin vawi khat a khingpui a inhnehtawkpui. 

Eddie Hearn chuan, "Canelo hian ticket hralh aṭanga ringawtin dollar maktaduai tel a hmu thei ṭhin a, mahse tunah erawh entu an awm thei tlat lo. Hei vang tak hian inbiakna pawh duh angin a awlsam thei lo a, mahse fighter pahnihin he inhnek hi thlentir ngei an duh a ni," a ti. 

Alvarez chotu Callum Smith hi Liverpool khaw chhuak niin vawi 27 fight-a hmachhawn tawhah a la chak vek a, a khingpui 19 zet chu a knockout thei a ni.