USA-ah La Liga match khel dawn ; Player lungawi lo an inhmukhawm!
La Liga thuneituten Spain-a league sang ber hi USA-ah match ṭhenkhat khel turin thutlukna an siam a, kum 15 chhung atan media company Relevent chu inremna an siampui.
Mahse, Spanish league thuneitute beisei ang ngawtin thil a kal awlsam dawn lo. Spanish footballer intelkhawm pawl Asociacion de Futbolistas Espanoles (AFE) chu Nilaini zan khan an inhmu khawm a, a tawp thlenga hmalak an tum.
AFE chuan an lungawi lohna ber chu player-te tana pawimawh, thutlukna lianthama rawn an ni lo hi a ni a, AFE president David Aganzo chuan, "Na taka hmalak kher hi kan duh lo a, mahse thil thlen danin a phut a nih chuan a tawp thlengin na takin kan kal ang," a ti.
Inremna chu
Spanish league hotuten khawvel hmun hrang hrangah La Liga entu tam se an duh a, sum an duh tel bawk. Inremna an siampui hi North America lama European club lian ho pre-season tournament lar International Champions Cup huaihawt ṭhintu Relevent an ni.
Inremna neih a nih hnu lawk hian La Liga president Javier Tebas chuan, "Bung thar min kaipuitu ropui tak a ni," a ti a, team inkhel tur bik leh a hun tur erawh chiang taka an la sawi theih loh thu a sawi bawk.
Spanish football hian an sumdawnna hmun zauh tumin nasa takin hma an la mek a, tun season-ah hian Copa del Rey leh La Liga champion ten an inchuh ṭhin Spanish Super Cup chu a vawi khat nan Spain pawnah khelh niin Morocco-ah an khel.
Mahse maw...
Spanish league thuneituten ram pawna an ram club inelna khelh an tuipui laklawh a, tun ṭum erawh thutlukna an siam fuh dawn lo niin a lang.
AFE president David Aganzo chuan, "Ngaihtuahna mumal seng miah loa thutlukna siam a ni hi a lungawi thlak lo a ni. Fans lam ngaihtuah miah loin thutlukna an siam a ni," a ti a, a lungawi lo hle.
Nilaini zana Spanish player inhmuh khawmah hian La Liga khel club 20 aiawh player te an tel vek a, player langsar zingah Real Madrid captain Sergio Ramos, Barcelona vice captain Sergio Busquets leh Atletico Madrid midfielder Koke te pawh an tel.
Player inlungrual
Spanish league thuneituten thutlukna an siam hun rei zawng hi kum 15 ngawt a ni a, a inkhel tur ber player-te rawn an ni miah lo hi thil mak tak chu a ni ve hrim hrim.
AFE president Aganzo chuan, "La Liga hotute thutlukna hi thil awmze nei lo ang mai a ni. Vawiin nia kan thusawi hi hun rei lo te atana thutlukna a ni satliah a, kum 15 daih inremn a ni tih an hriat a ṭul," a ti a, a lungawi thei lo.
Real Madrid striker hlui chuan La Liga thutlukna do tura player zawng zawng an inthurual thu sawiin, "Thuneitute nen kan inbiak fel vat a ngai ang. La Liga club captain-te chu he thutluknaah hian an lungawi lo em em a, Spanish league thutlukna hi an do tlat a, an lungawi lohnaah hian an inlungrual em em a ni," a ti a, September-ah an inhmuhkhawm leh tur thu a sawi bawk.
Football ti hmel hem tu!
AFE chuan thuchhuah siamin, "Player-te rawn ni ve miah loa thutlukna siam a ni hi a mak a ni. La Liga hian player ngaina tak taktu fan-te an pawt hla a, chu chuan football mawina a ti hmelhem a ni," an ti.
A inkhel tur ber player-te an lungawi tak lohah chuan Spanish league lam pawh ngaihngam takin an awm thei bik lo. La Liga chuan thuchhuah siamin, "La Liga chuan ram pawna league khelh chungchangah AFE thuneitute inbiakna a neihpui dawn a ni," tiin thuchhuah an siam.
Relevent chairman Stephen Ross-a'n, "North America-a football ṭhan zel nana thutlukna pawimawh tak a ni," tia a lo sawi tawh inremna hi sut a nih leh dawn nge a kaltlang dawn, tih chu hunin a hril ang.