India-in medal lak belh

Indian tennis player Ankita Raina chuan nimin khan Asian Games neih mekah bronze medal a vaw chhuak. Ankita hian semifinal-ah China nula Zhang Shuai chu 4-6, 6-7 (6) in hneh lo mah se medal hlawh chhuak phak chinah a awm.

Sania Mirza chuan 2006 Asian Games-ah khan silver a la tawh a, 2010 khan bronze a la leh bawk - ani hnuah chuan Ankita hi India nula zinga tennis singles huanga medal vaw chhuak leh thei hmasa ber a ni.

Nimin tho khan Indian men's double team Rohan Bopanna leh Divij Sharan te ṭangdun chuan Japanese duo Kaito Uesugi leh Sho Shimabukuro te chu 4-6, 6-3, 10-8 a hnehin final an lut bawk, a chhe berah silver medal chu an dawng dawn tih a chiang.

Inelna pumpuiah India hian nimin tlai thleng khan medal 17 la tawhin, table-ah pakuana dinhmun an luah mek a, gold an lak zat chu pali a ni. Hmahruaitu China erawh an sang fal hle, gold ringawt pawh 51 an la tawh a, pahnihna Japan pawhin gold 20 an nei tawh bawk.