Aizawl FC an inthuam ṭha

I League club Aizawl FC chuan Mizoram Premier League season tharah champion ngei tumin squad an inthuam ṭha mek - foreigner pahnih an lakluh belh.

Manipur coach Gift Raikhan kaihhruaina hnuaiah I Day Football final an thleng a, Chhinga Veng hneh loin nomawi an thlir liam.

MPL-ah erawh Chhingcows kawng dal ngei tumin Aizawl FC-in player thar an lalut. Gift Raikhan-a'n Neroca a enkawl laia a chhawr ṭhin David Biakzara chu Mizo club-ah a hruai lut a, Manipur defender tawnhriat nei ṭha Govin Singh bakah goalkeeper Gurpreet Singh te chu Indian player zinga an lakbelh te an ni.

Heng bakah hian Mizorama tawnhriat nei tawh Nigerian defender ball pet thiam Kareem Omolaja chu an la let a, ISL club NorthEast United tana khel tawh Ghanaian forward Francis Dadzie an lalut bawk.

An ṭha sa

AFC hian an squad neih sa angin MPL hmachhawn se Alfred Kemah Jaryan, Lalrinfela, Lalkhawpuimawia, David Lalrinmuana, Lalrinchhana Tochhawng leh player ṭha an kawl hnem avangin champion rinkai zingah an tel pha ang.

Amaherawhchu Aizawl FC hian October thlaa ṭan tur I League an khelh kawp a ṭul avangin an squad tihchhah hi an mamawh avangin inlak belh hi a ṭul a ni.

Foreigner 2 leh 5?

Aizawl FC-in I League atan foreinger panga lak an tum a, tunah hian pathum an tichiang tawh. MPL lamah erawh pathum chiah ziahluh theih a nih avangin an ziah luh tur ber a la chiang lo.

MPL-ah hian foreigner pathum an ziak lut thei a; nimahsela ṭum khatah foreigner hi pahnih bak an khel thei lo thung a ni.

Tuna a lan dan chuan tualchhung football hre chiang tawh Alfred-a hi chu tel chiang tura ngaih a ni a, nikum lama MPL khel tawh Kareem bakah North East United striker hlui Francis Dadzie an thlan a rinawm.

Nikum I League best coach Gift Raikhan-a'n thlan tur ṭhahnem tak a nei a, an squad chhah tak avang hian tualchhung inelna ngaihhlut MPL an tihmuhnawm sawt ang.

Tawnhriat nei ṭha!

Tuna an squad neih laiah hian tualchhung football-a tawnhriat nei ṭha an awm khawm a, tuna an lak tharah hian India rama tawnhriat nei ṭha tawh Govin Singh a tel.

Kum 30 mi defender hian season liam ta khan Neroca tan ṭha takin a khel a, Manipur club tana a khelh hma hian East Bengal, Salgaocar, Shillong Lajong, Royal Wahingdoh, Delhi Dynamos, Pune City FC leh club ṭhahnem takah a khel tawh.

Goalkeeper Gurpreet erawh tawnhriat ngah tak a ni bik lo a, kum 2014 khan TATA Football Academy aṭangin Goan club Dempo FC a zawm. 2017-18 season khan ISL Draft-ah dah a ni a, NorthEast United-ah contract ziak mah se khelhna hmun a chang lo a, India ram football a hming chher turin Aizawl FC aṭangin bul ṭan ṭhat a tum a ni.

Aizawl FC hian tunah Mizo goalkeeper ṭha leh MPL-a mimal lawmman la hnem ber Lalawmpuia an kawl mek bawk a ni.