F1 season kal lai a ngaihnawm - Wolff

Mercedes boss Toto Wolff chuan kum dang zawng aiin tun season kal lai chu ngaihnawn a tih thu a sawi, team leh driver ang pawhin champion tur hriatthiam a harsat thu a sawi chhuak.

Driver champion lai Lewis Hamilton chuan a elpui Sebastian Vettel lakah hma a hruai fal leh tawh a, Britain driver awmna team Mercedes chu kum hmasa lam ang bawkin constructors' championship hma hruaitu an ni mek bawk - tun kar tawpa tlan tur Belgian Grand Prix-ah pawh chak tura rinkai an ni.

Ferrari driver Vettel-a'n season kal laiah vawi 24 hnehna a chang tawh a, mahse a elpui Hamilton chu point 24 zetin a phak lo mek. Red Bull driver Daniel Ricciardo pawhin vawi hnih hnehna chang tawhin, a teammate Max Verstappen chu a hmasa berah vawi khat a thleng tawh bawk.

Season chawhnu lam thlir lawkin Wolff chuan, "Rinlawk thiam a harsa hle, season kal laiah hian champion tura rinkai ber sawi tur bik kan awm lo, a harsa in a hautak takzet a ni. Chutih rualin inelna a hautak pauh leh keini lam chuan nuam kan ti zawk, kar tawpah pawh a ṭha ber nih kan tum ang," a ti.

F1 hi tun season chhungin vawi 21 an tlan dawn a, heng zingah 12 chu an tlan tawh. Pathianni zan dar 6:40 hian Spa-Francorchamps tlankawngah Belgian Grand Prix an tlan ang.