Fourth & fifth test atan India insiksawi

India chuan England nen test series an khelh mekah a vawi thumnaah hnehna an chang a, fourth leh fifth test khelh hmabak atan squad an inthlak danglam.

Kum 18 mi Prithvi Shaw chuan opener Murali Vijay a thlak ang a, off-spin a vawm thiam Hanuma Vihari chuan left-arm wrist-spinner Kuldeep Yadav a thlak bawk ang.

Fourth Test hi August 30 tlai dar 3:30 aṭangin khelh ṭan a ni dawn. India hian test match hmasa pahniha an chak loh avangin series la tur chuan chak loh a thiang tawh lo.

Opener Shaw hian first class match vawi 14 a khelhah ṭum sarih century a siam a, kumina India-in Under 19 World Cup an champion khan captain a ni bawk.

July thla khan India A leh West Indies A inkhelh ṭumin Shaw hian run 188 a vaw chhuak. Thla liam ta mai khan West Indies A leh Leicestershire lakah one-day century a siam ve ve a, amaherawhchu England Liones laka 253 runs zeta an chak loh ṭum erawh run 65 siamin vawi khat dangah erawh bowl hnih lekah run siam loin a thi thung.

Shaw leh India squad-a awm thar kum 24 mi Vihari hian tun thla khan South Africa A lakah century an siam ve ve a. Vihari hian first class match 63 a khelh tawh aṭangin century vawi 15 a siam tawh.

Fourth test hi August 20 - September 3 inkarah khelh tur a ni a, fifth test hi September 7-11 inkara khelh tur a ni thung.

Fourth leh fifth Test atana India squad : Virat Kohli (capt), Shikhar Dhawan, KL Rahul, Prithvi Shaw, Cheteshwar Pujara, Ajinkya Rahane, Rishabh Pant (wk), Hardik Pandya, Ravichandran Ashwin, Ravindra Jadeja, Jasprit Bumrah, Ishant Sharma, Mohammed Shami, Umesh Yadav, Shardul Thakur, Karun Nair, Dinesh Karthik (wk), Hanuma Vihari.