Badminton hmanga hausa Sindhu

Pusarla Venkata Sindhu chu hmeichhe infiammi hausa zual thlan chhuah zingah pasarihna a ni nawlh a, Indian nulain badminton hmanga khawvel a den chhuah dan hian mak tih a hlawh a, khawthlang media-te titi tui ber pakhat a tling chhunzawm nghal.

Sindhu chu tu nge ni? tih chu Olympic 2016 neih hma a mi tam tak zawhna a ni a, a bik takin infiammite sponsor tu company lam chuan cricket lalna India ramah hian cricketer-te inremna an neihpui theih chuan an duhtawk viau; Sindhu a rawn lan chinah erawh thil a danglam a, a chanchin hian ram chhung mai bakah khawvel a deng chhuak.

Nula hausa!

Tennis star Serena Williams leh Maria Sharapova te hi midang chunga leng an ni a, hmeichhe infiammi dangte tan el phak an ni ngai lo. Sindhu hian anni pahnih hi phak chiah lo mah se, tennis world number 1 nilai Simona Halep aiin a sum lakluh hi a let li vel zetin a tam zawk! A sum hmuh tam zawk chu court pawn aṭangin a ni.

Kum 23 mi Sindhu hian June 2017

aṭanga June 2018 chhung khan £6.6m (Rs 59,54,23,042) a lalut hman a, heng zinga £6.2m zet hi sponsor aṭanga a hmuh a ni, sum lakluh hnem lamah pasarihna ni mah se, sponsor aṭang bika an lakluh chhut chuan Serena leh Sharapova te dawtah Sindhu hi pathumna a ni phak.

Sindhu hian June 2017 aṭanga June 2018 chhung khan badminton lawmman

aṭangin £387,000 a lalut a, court pawn lam aṭanga £6.2m zet a lalut thei hi a ropuina a ni - kar khatah £126,000 (Rs 1,13,69,271) zel hlawh ang a ni, Premier League player hlawh sang zual ho lakluh ang deuh thaw a lalut phak hial.

Badminton

Hyderabad, Telangana-a piang Sindhu hi infiammi chhungkuaa piang a ni, a nu leh pa P. V. Ramana leh P. Vijaya te chu volleyball player niin, national level pawha inlan phak an ni. Volleyball player fanu ni mah se, Sindhu hian kum ruk mi chauh a nih lai aṭangin badminton a khel ta zawk a, amah kaihruaitu chu All England Open Badminton Championships 2001 champion Pullela Gopichand a ni.

Tualchhung leh ram pum huap inelna huangah hlawhtling tawh mah se Sindhu hian khawvel hmelhriat a hlawh zualna tak chu Rio Olympic kha a ni. Seeded pakuana ni chungin a inlan a, a kalkawngah player langsar tak tak - Tai Tzu-ying, Wang Yihan leh Nozomi Okuhara te a hneh. Final-ah Carolina Marin hneh lo mah se silver medal a hlawh chhuak.

Sindhu tu nge?

India ramin Olympic-ah medal a lak tawh belhkhawm chu 28 a ni a, heng zinga panga chu hmeichhe lak a ni. Hmeichhe infiammi zingah gold la phak an la awm ngai lo, Sindhu-i'n silver a lak hi India nulate thlen san ber a ni. 2012 London Olympic-ah khan Saina Nehwal chuan bronze medal a lo hlawh chhuak tawh.

Brazil khawpui Rio aṭanga a haw hnuah Sindhu hi India mipuite 'Icon' thar a ni. Olympic champion Marin-i'n Spain sorkar aṭangin Rs 69,91,391 a dawn laiin; Sindhu erawhin sorkar aṭanga a dawn belhkhawm chu Rs 9,80,77,000 zet a ni hem mai!

Sports marketing firm Baseline Ventures-a an managing director Tuhin Mishra chuan, "Olympic 2016 neih hma kha chuan, infiammi sponsor tur kan zawn hian tu nge Sindhu (Sindhu who?) tih hi kan inzawt ṭhin. A nihna takah chuan company te hi chuan cricket nena inzawmna neih mai kan duh ṭhin," tiin a sawi.

Olympic hnuah Sindhu hi sumdawng miten inremna neihpui an inchuh, Andhra Pradesh leh Telangana sorkarin ram (land) an pek bakah; Bridgestone Tyres, sports drink Gatorade, pain reliever ointment Moov, online fashion store Myntra, Nokia, Panasonic, honey producer APIS Himalaya, herbal health drink firm Ojasvita leh Bank of Baroda te chu sponsor lian zual an ni - Central Reserve Police Force leh Vizag Steel tan brand ambassador a ni bawk.

Mimal leh pawl hrang hrangin sum faiin an pek bakah, cricket icon Sachin Tendulkar chuan BMW car a pe. India cricket team captain Virat Kohli ang em chuan sum lalut hnem lo mah se, Indian cricketer hlawh hnem ṭhenkhat sum lakluh zat a la phak daih a ni.

Court lamah

Sum ngahin hausa tawh hle mah se Sindhu hian a dan pangngaiin badminton khelh aia nuam tih a la nei chuang lo. Kum 2017 leh 2018 World Championship-ah khan pahnihna a ni leh a, 2018 Commonwealth Games-ah khan singles huangah silver a lak bakah mixed team chuan gold an vaw chhuak bawk.

Asian Games 2018-ah Sindhu hi a inlan zui leh a, Asian ramte inelna lianah hian seeded pathumna a ni. Indian shuttler zingah Syed Modi chuan 1982 khan bronze medal a la tawh a, ani hnuah medal vaw chhuak thei an la awm leh lo - Sindhu hian player dangte tih theih loh a rawn ti leh a nih pawhin a mak lo ang.