City, Liverpool, Chelsea = 6 points ; Kartawpah team lian an inlan dawn
Premier League zirchiang leh hrechiangtu ten tun season-ah pawh champion tura an beisei chu Manchester City a ni. He team hian player leh coach an neih ṭhat avangin champion beisei kai ber an ni hi thil awm lo a ni lo.
Footballer hranghlui leh television pundit ten City elpha ber tura an ngaih chu Liverpool a ni. He club hian Premier League nomawi la chawi lo mah se season hman zawh takah Champions League final an luh avangin theihna an neisang a, an tlarhnung buaina Virgil van Dijk leh Alisson hmangin an chingfel hret hret nia a lan bawk avangin City elpha tura ngaih an ni hi thil awm tak a ni.
Team pahnih kara hming lamrik rin pawl chu Chelsea an ni. London club hian Antonio Conte banin Maurizio Sarri an lalut a, Italian manager enkawlna hnuaia indinthar mek an nih avangin an phur a, City leh Liverpool el turin an ṭha tawk.
Tun season bikah team pathumin in anna an nei a, chu chu Premier League-a match hnih an khelh tawhah point ruk an nei vek hi a ni. City hian vawiin tlai dar 5:00-ah Wolverhampton Wanderers an mikhual dawn a, Liverpool-in dar 10:00-ah Brighton mikhualin Chelsea-in Pathianni zan dar 8:30-ah Newcastle United an lenchilh ang.
Team hmuhnawm City
Season hman zawh takah tuma el rual lohin Manchester City an champion a, kuminah chhunzawm turin an inbuatsaih mek a, chumi ti tur chuan theihna an nei bawk. Match hnih lekah goal riat ngawt an khung tawh a, goal khat chiah an la chhuah.
Hliam vangin Kevin De Bruyne chu thla thum chhung chan dawn mah se Belgian midfielder tel lo pawhin an buai lo tih KDB tel loa an match hmasa berah an pholang nghal a, Huddersfield chu 6-1 ngawtin an sawp!
Man City boss Pep Guardiola-a'n he match-ah hian player langsar Raheem Sterling, Leroy Sane leh Riyad Mahrez te chu bench-ah a dah vek a, an talbuai phah lo - Sergio Aguero, Gabrirel Jesus, David Silva leh Bernardo Silva te ho an la awm tlat!
Zanina an lenchilh tur Wolves hian player langsar tak tak Joao Moutinho, Rui Patricio leh Ruben Neves te ho nei mah se an match hmasa pahnihah point khat chiah an la hlawh chhuak a, City lakah chak tura beisei ngam chi an ni lo - Pep leh a naute hian hnehna an chang a nih chuan 2011-12 season-a Manchester United hnua Premier League champion lai, season thar match hmasa pathuma chak thei hmasa ber an ni ang.
Liverpool leh siamtharna!
Reds manager Jurgen Klopp-a'n an chak lohna lai a hrechiang a, nipui transfer laiin AS Roma goalkeeper Alisson Becker chu pound maktaduai 66.8 ngawtin an lalut a, Klopp-a'n tlarhnung venhim a duh tih a chiang.
Tlarhmaa Mohamed Salah, Roberto Firmino leh Mohamed Salah neitu team hian goal khung an thiam tih chu season hmasa aṭangin a chiang tawh a, mahse an goal khung theih tluk zeta a chhuah lam an uar avangin result ṭha an hlawh chhuak zo lo fo ṭhin.
Tun season match hnih aṭang ringawta teh chuan Liverpool hian he an hri ṭha lo vei hi an bansan tawh niin a lang - match hnihah vawi ruk an pet goal a, goal chhuah an la nei lo!
Hetihrual hian Liverpool hi an fixture thlirin an vanneiah a chhiar theih a, City leh Chelsea-in team liana ngaih Arsenal an hmachhawn ve ve tawh a, Reds-in team lian tia sawi tur hmachhawn an la nei lo thung. Zaninah pawh Brighton lakah hnehna chang ngei tura beisei an ni.
Chelsea thar?
Blues-in an match hmasa berah harsatna nei loin Huddersfield chu 3-0 in an sawp a, Stamford Bridge-ah Arsenal mikhual zuiin 2-0 a hma an hruai hnuah an inlehthal tir ṭhelh a, a tawpah 3-2 in hnehna an chang hram.
Arsenal lakah Blues chak lohna langchiang tak chu tlarhnung a phui tawk lo kha a ni. Coach thar Sarri-a'n Blues tlarhnung hi a siam ṭha thuai a nih loh chuan tlarhma nei ṭha zawk team an hmachhawn hunah an talbuai ang.
Hetihlai hian Chelsea fans tana thu hriat nuam tak tur erawh chu an thiampuipa Eden Hazard-a'n inkhel bul a la ṭan lo chungin assist vawi hnih a nei tawh a, Newcastle lakah chuan inkhel bul a ṭan tawh beisei a ni - result tidanglam thei khawpa player thiam bik a ni.
Magpies manager Rafael Benitez hi Chelsea enkawla Europa League nomawi lo chawi tawh a nih avangin Blues a hre nual ang tih a rinawm a, mahse Sarri enkawl team erawh a hriat ṭhin Chelsea nen a danglam tawh ngei ang.
Zanin Inkhel Tur
Wolverhampton 5:00 PM Manchester City
AFC Bournemouth 7:30 PM Everton
Arsenal 7:30 PM West Ham United
Huddersfield Town 7:30 PM Cardiff City
Southampton 7:30 PM Leicester City
Liverpool 10:00 PM Brighton & Hove
August 26, Pathianni
Watford 6:00 PM Crystal Palace
Fulham 8:30 PM Burnley
Newcastle United 8:30 PM Chelsea
August 27, Thawhtanni Zan
Manchester United 12:30 AM Tottenham Hotspur