Tv lamah La Liga a en theih leh dawn

Khawvela social networking site hman hlawh ber Facebook-in India leh a chhehvel rama La Liga match live-a chhuah phalna an lei hnuah Sony Pictures Networks India (SPN) nen inremna an siam leh a, La Liga ṭantir lam television-a kan en theih loh zet hnuah TV hmangin Spanish league hi kan en thei leh dawn.

La Liga hian Facebook chu kum thum chhung atan dollar maktaduai 32-a Indian sub-continent a live streaming hmanga chhuah turin an lei a, tunah chuan TV lama chhuah turin Sony hi inremna an neihpui ve leh chhawng a ni.

Hetihrual hian La Liga match zawng zawng hi television-ah pek chhuah a ni dawn lo a, company hi match 100 atan an inrem a, La Liga match-a ngaihven hlawh zinga mi El Clasico leh Madrid derby te chu TV aṭanga en theih tur zingah a tel.

La Liga hi zaninah khelh ṭan a ni leh tawh dawn a, Atletico Madrid chuan zanin dar 11:45 hian Rayo Vallecano an mikhual ang a, dar 1:45-ah Barcelona chuan Valladolid an lenchilh ve bawk ang.

Real Madrid erawh Pathianni zanah an inlan dawn chauh a, European champion hian Pathianni zan dar 1:45-ah Girona chu khualmualah an lenchilh dawn a ni.

Zanin Inkhel Tur
Getafe 11:45 PM Eibar
Leganés 1:45 AM Real Sociedad
August 25, Inrinni
Deportivo Alavés 9:45 PM Real Betis
Atlético Madrid 11:45 PM Rayo Vallecano
Real Valladolid 1:45 AM Barcelona
August 26, Pathianni
Espanyol 9:45 PM Valencia
Sevilla 11:45 PM Villarreal
Girona 1:45 AM Real Madrid
August 27, Thawhtanni Zan
Levante 11:45 PM Celta de Vigo
Athletic Bilbao 1:30 AM Huesca