NothEast aiawh tur Mizoram leh Arunachal Pradesh

National Sub Junior Football Championship final round khel turin Mizoram chuan nimin khan Meghalaya 2-0 in an hneh a, Tripura 14-0 a hneh tawh bawkin chiang taka group A hmahruaitu nichungin final round an lut.

Vawiin tlai dar 2:30-ah Manipur leh Assam ten group match hnuhnung ber khel dawn mah se team pahnih hneh ve ve tu Arunachal Pradesh pawhin final round an lut bawk.

A fuh nghal lo

Mizoramin an khingpui Meghalaya aia Tripura an sawp loh zawk avangin chak ngei a ngai a, tla thei dinhmunah an ding. Inkhelh ṭantirh lamah Meghalaya lamin freekick aṭanga woodwork an tih per bawk avangin Mizoram an hlauthawng. Mualneitu hian ground ball nen bul an ṭan a, amaherawhchu ball an inpekna tam zawk hi anmahni lam a ni a, Meghalaya an chhaih buai pha lo.

Mizoram hian lei hrula ball an inpekna lamah tihsual an nei fo a, Meghalaya-in vuak letna remchang an neih phah a, amaherawhchu mikhual team hian goal erawh an khung thei lo.

A fuh ta

Meghalaya tlarhnung ṭhiat turin Mizoramin an khelh dan an thlak hret a, lei hrula ball inpe siin ball an vawrh tel. Minute 17-naah Lunglei Serkawn rawlthar Lalhualhima chuan defender a vawrh khum a, Champhai Zotlang rawlthar Lalfakzuala chuan nang fuhin hmahruaina goal a khung.

Minute 28-naah goal hnihna a hmuh tur a awm zui a, Parvatui rawlthar Vanlalmalsawma chuan ṭha taka a um luh hnuah box pawn aṭangin Meghalaya defender pahnih a bum leh a, a hahthlak zawng zawng a tih vek hnuah Rohlupuia pein Hnahthial Electric Veng tlangval hian a pet goal.

First half-ah Meghalaya jersey number 10 Emboklang Nongkhlaw chuan goal khungna hun ṭha a nei a, match hmasa bera goal ruk zet khungtu ball pet hi College Veng rawlthar Lalhruaitluanga'n ṭha zetin a dan sak. Second half-ah goal chance a tam lo a, Mizoram midfielder Rohlupuia'n keeper Luckystar Lawai a paltlang thei lo.

Mizoramin 2-0 in hnehna an chang a, inelna thlengtu hian chak phu khawpin an khel ṭha tel bawk.

Engtin zel?

Kolasib mipuiin India ram pum huap Sub Junior inelna an hlut a, entu an pungkhawm ṭhat avangin Mizoramin 'home advantage' an neih theih phah.

Mizoram coach Samuel Lalringngheta chuan, "Final round kan thlen avangin kan lawm a, kan khelh danah erawh tun aia ṭhaa khel thei kan nih avangin kan lawm a kim lo. Damlo chunga khelte an awm a, chu chuan kan game-ah nghawng a neiin ka hria," tiin Vanglaini a hrilh.

Bungkawn tlangval Samu-a chuan sawi chhunzawmin, "Kolasib mipui kan chungah an ṭha a, min ṭawimawmna vangin kan lawm takzet. Nikum lamah final round kan thlen loh avangin tun ṭuma kan result hi a lawmawm a, kan ṭawngṭai tam rah a ni," tiin a sawi.

Mizoram hi kum 2016 khan Kozhikode, Kerala-ah National Sub Junior Football Championship-ah an champion a, nikum khan final round an lut pha lo thung.

Results leh Fixtures
Group A
August 20, Thawhṭanni
Mizoram 14 - 0 Tripura
MIZ : Rohlupuia 28', 42, 50'; Vanmalsawma 37', 39, 43'; Lalfakzuala 52'; Vanlalmuanpuia 54', 83'; Malsawmhlua 64'; C. Lalmuanpuia 67'; Isak Zomuanpuia 85', 86'; Jacob Lalhmangaiha 90+2'
August 22, Nilaini
Tripura 0 - 16 Meghalaya
MEG : Samlang Rympei 7', 37', 43'; Emboklang Nongkhlaw 17', 31', 32', 34', 45', 57'; Batskhemlang Jyrwa 25', 43', 77'; Treimiki Lamurong 41'; Wandajied Kynsai Ryngkhlem 59', 64'; Bakmenglang Kharthangmaw 67'
Nimin Inkhel Result
Meghalaya 0 - 2 Mizoram
MIZ : Lalfakzuala 17'; Rohlupuia 28'

# Team Pld W D L GF GA GD Pts
1 Mizoram 2 2 0 0 18 0 18 6
2 Meghalaya 2 1 0 1 14 2 12 3
3 Tripura 2 0 0 2 30 0 30 0

Group B
August 21, Thawhlehni
Assam 0 - 4 Arunachal Pradesh
AP : Promod Subba 3'; Khumanthem Biken 23'; Chapamayum Ratanbi Singh 41'; Pravin Dorjee 87'
August 23, Ningani
Arunachal Pradesh 2 - 0 Manipur
AP : Promod Subra 45+1; Chaphamayum Ratanbi Singh 89'
Vawiin Inkhel Tur
Manipur 2:30 PM Assam

# Team Pld W D L GF GA GD Pts
1 Arunachal 2 2 0 0 6 0 6 6
2 Manipur 1 0 0 1 0 2 -2 3
3 Assam 1 0 0 1 0 4 -4 0