City neitupa unaupain Liverpool a duh

Manchester City neitupa Sheik Mansour-a cousin Sheik Khaled Bin Zayed Al Nehayan chuan Liverpool chu dollar tluklehdingawn hnihin lei duh mah se a duhna hi a hlawhtling lo.

Liverpool chhungkuaa mi chuan BBC hnenah an club chu zawrhlai a nih loh thu a hrilh a, hei vang hian Merseyside club hi hralh an remti lo. Reds neitute hian dollar tluklehdingawn hnih hian hralh se chuan football club hralh to ber an ni ang.

Reds chhungkuaa mi, a hming tarlan loh chuan Fenway Sports Group (FSG) hian club lei duha dawrna chu an dawng reng a, mahse 'direct' takin dawrna hi kalpui a ni lo a, financial services company pakhat chuan he indawrna hi an kalpui vel a ni.

Daily Mail lamin an tarlan dan chuan Sheikh Khaled Bin Zayed Al Nehayan hian kum 2017 tawp lam leh 2018 kum tir vel khan Liverpool hi a dawr fo a, amah bakah sum thawh tur zingah Chinese sumdawng hausa a tel bawk.

Sheikh Khaled-a company Bin Zayed Group-a managing director Midhat Kidwai chuan Liverpool chairman Tom Werner chu New York-ah inbiakna a neihpui bawk a, mahse he inbiakna hian Liverpool neitu John Henry leh Mike Gordon te a thleng phak ta lo.

Kum 2010-a pound maktaduai 300-a Liverpool leitu Fenway Sports Group hian Premier League club hi 'super power' nih tir an duh a, transfer bazar-ah tu pawh el phak nih an duh.

He an ruahmanna hlawhtlin tir tur hian American firm pakhat Allen & Co chu thawhpuiin club-a investment ti thei tur zawng turin an ti a, he company hian Sheik Khaled chu inbiakna neihpuiin ani hian a vai law law a lei a lo duh si a ni!

May thlaa business services group KPMG-in a zirchiannaa a tihlan dan chuan Liverpool hlutzawng hi pound tluklehdingawn 1.42 a ni a, a hlutna aia dollar maktaduai 580 ngawta an ngam chung pawhin FSG lam hian hralh em chu an phal lo.

Football club zinga hlu ber anga ngaih chu Manchester United niin KPMG chuan pound tluklehdingawn 2.93-a hluah a chhut a, Real Madrid (£2.63bn), Barcelona (£2.5bn) leh German club Bayern Munich (£2.3bn) te pawhin an phak lo.

Khawvela football club inleina to ber pawh Manchester United tho an ni a, 2005 khan Malcolm Glazer chuan pound maktaduai 790-in a lei a, Liverpool neitute hian an club hi hralh remti se chuan pound maktaduai tluklehdingawn khat chuangin an khum dawn tihna a ni.