Champion tura rinkai Hamilton?

Formula 1 season chaw­hnu lam hman ṭan a ni dawn, Pathianni zan dar 6:40 hian Spa-Francorchamps tlan­kawngah 2018 Belgian Grand Prix tlan a ni dawn. Driver championship hmahruaitu Lewis Ha­milton chu mipui mit fukna tur a ni.

World champion vawi li ni tawh Hamilton hian a elpui Sebastian Vettel lakah point 24 zetin hma a hruai fal tawh a, a nomawi humhim turin a dinhmun a ṭha tawh. Chutih rualin intlansiak vawi khata hnehna changin point 25 hmuh theih a ni a, chetsual vanga tlan tluan theih loh niah an elpui ten hnehna an chang a nih chuan an dinhmun a la inthlak danglam nasa thei dawn hle.

F1 intlansiak hnu­hnung pahnihah Britain tlangval Hamilton hian hnehna a chang, mahse heng a chakna hi insawi theihna chi a ni lo. Hnehna chang tura ngaih Vettel chetsual zar a zo ang pawh a sawi theih a ni zawk, season hmasa lam aiin Ferrari hian Mercedes an el thei a, intlansiak ṭhenkhatah chuan an car a chak zawk.

Mercedes driver Hamilton chuan, "Hma­hruaitu nih vangin champion dawn tihna a la ni lo, hna chanve kan zo chauh a ni a, kawng zawh tur kan la ngah hle. Ferrari hi an beidawng ve ngai lo, chuvangin keini pawhin tha kan thlah lo ang," a ti.