Greece-ah Burnley an tlawm

Premier League club Burnley-in 1966-67 hnua a vawi khat nana European competition khelh an tumna chu dinhmun derthawngah a awm mek.

Ningani zan khan Europa League playoff-ah Olympiakos an lenchilh a, 3-1 ngawtin an tlawm. Greece-a inkhelah football-a thleng ṭhin hmuh­nawm zawng zawng chu a thleng kim. Team inngam, goal mawi, penalty leh red card hmuh turin a awm vek - Burnley hian minute 59 hnu lam chu Ben Gibson hnawhchhuah a nih avangin player 10-in an khel.

Burnley hian khelmual pawn lamah pawh chanchin lawmawm lo an nei a, an fan pakhat chu chemtea vih niin a dang paliin hliam an tuar bawk. Burnley chuan Olympiakos leh Greece police te nen thil thleng chungchang hi an chhui mek thu an sawi.

Hetihlai hian Champions League third qualifying round aṭanga petchhuah Celtic-in an chet ṭhat loh an chhunzawm zel a, an mikhualna ramah Lithuanian club Suduva chu goal khat ve ve khungin an inhnehtawkpui!

Inkhel hmuhnawm chu

Greece-a inkhelah minute 19-na lekah goal kan hmu nghal a, Qlympiakos captain Kostas Fortounis chuan free­kick hmangin mawi zetin goal hmahruai a khung.

Qlympiakos hlim chhung erawh a rei lo. Minute 33-naah Chris Wood chu penalty area-ah tih tluk a ni a, New Zealand striker hian hei hi goal-ah chantirin chawlhlawk hman a nih chuan 1-1 in team pahnih an inhnehtawk.

Mahse, chawlhlawk hman a nih hnuah Greece club-in inkhel an thunun a, minute thum hnu lawkah Andreas Bouchalakis chuan an hmahruaina goal a khung chhunzawm.

Burnley vanduai a kal­tluang a, defender Gibson chuan penalty area-ah a kuta ball a khawih fuh avangin a yellow card pahnihna pek a ni a, hnawhchhuah zui niin Fortounis chuan he penalty hi goal-ah a chantir zui a, 3-1 in Burnley an tlawm.

Dyche a lawm lo

Match official ten inkhel an kaihhruai danah Burnley boss Sean Dyche a lawm lo a, referee chu na takin a sawisel. Kum 47 mi manager chuan, "Ben Gibson kha engvanga yellow card pe nge a nih ka hrethiam thei lo.

"Yellow card hmasa zawk kha chu a dik a ni mai thei a, a pahnihna erawh a dik lo. Shot lokal chu dan a tum a, chu chuan a kut a per fuh palh a, tum reng vanga a kut kha hmang a ni lo," tiin a lawm lo hle.

Kum 47 mi manager hi referee lakah a lungawi thei ngang lo a, second leg thlirlawkin, "Kan fan-te ka hrethiam a ni. Inkhel 'balance' tak hmuh tumin an lokal a, mahse chu chu match official ten min hmuhtir si lo. Kan intawn leh hunah chuan a danglam tawh mahna," a ti.

Burnley hian penalty leh red card an hmuh bakah hian Sam Vokes-a goal khung chu offside vangin pawmsak a ni lo bawk a, Pathianni zan dar 8:30-a Premier League-a Fulham lenchilh tur team tan second leg a harsa tawh ang.

Celtic an chul?

Lithuanian champion Sudu­va lakah Celtic hian hnehna chang turin harsatna an tawh a rinawm lo a, mahse lehkha lama tarlan a nih ang ngawt erawh a ni lo.

Scottish champion hian minute thumna lekah Olivier Ntcham tauh luh hmangin hma an hruai a, awlsam takin hnehna an chang dawn niin a lang. Mahse, tun hnaia sawisel hlawh tak Celtic tlarhnung an lo la phui lo a, vengtu nei lo Ovidijus Verbickas chuan minute 10 hnu lawkah an si phurh sut ve nghalin 1-1 in an inhnehtawk.

Champions League third qualifying round-a AEK Athens an ngam loh avanga Europa League playoff khel Celtic hian an match hnuhnung pasarihah vawi hnih chiah hnehna an la chang a, match rukha goal an chhuah!

Celtic boss Brendan Rodgers chuan, "Kan rilru kan pe tawk lo a, tlarhnung lamah kan hnathawh tur kan thawk ṭha tawk lo. Set piece aṭanga goal chhuah lo turin kha aia ṭha zawk khan kan ti thei a ni," a ti a, a naute khelh danah a lawm lo hle.