Bundesliga season thar a in ṭan ta
Nizan khan Bundesliga season thar match hmasa ber chu champion lai Bayern Munich leh Hoffenheim ten an khel ṭan a, Pathianni zan hian Bavarians elpha thei tura ngaih Borussia Dortmund leh RB Leipzig te an inhmachhawn dawn.
Thlirletna
Season liam ta khan Bayern an champion a, tun season-ah Schalke, Hoffenheim leh Borussia Dortmund te nen Champions League an khel dawn.
Europa League-ah Bayer Leverkusen, RB Leipzig leh Eintracht Frankfurt te an inlan dawn. Hamburg leh FC Cologne te chu division hniam zawk 2.Bundesliga-ah an relegate a. Tun season-ah hian Fortuna Dusseldorf leh Nurnberg te chu kai thar an ni.
Manager thar pali
Bayern Munich-in Jupp Heynckes thlak nan Eintracht Frankfurt aṭangin Niko Kovac an lalut a, Frankfurt-in Croatian manager thlak nan Adi Hutter an la ve bawk.
Borussia Dortmund-in Paris St Germain pantu manager Thomas Tuchel aiah French club Nice aṭangin Swiss manager Lucien Favre an la. RB Leipzig chuan an manager hlui Ralf Rangnick chu team enkawl turin an la let.
Team 18 inelna season ṭantirhah team paliin manager thar nen inkhel bul an ṭan dawn a, season chawhnu lamah manager inthlak an awm leh ngei a rinawm bawk.
Transfer lian bik
Bayern Munich-in Douglas Costa leh Arturo Vidal te chu a nghetin an chhuahtir a, Schalke aṭangin Leon Gorezka an lalut thung.
Gorezka bakah hian Schalke hian Max Meyer leh Benedikt Howedes te an chan a, amaherawhchu Hoffenheim aṭangin Mark Uth an lalut thung.
Borussia Dortmund-in Mainz aṭangin defender Abdou Diallo an thlem chhuak a, chutihrualin hming langsar Andriy Yarmolenko, Andre Schurrle (loan) leh Sokratis Papastathopoulos bakah season chanve chhung atana loan-a an hawh Michy Batshuayi te an chan.
Bayer Leverkusen-in an goalkeeper Bernd Leno chu Arsenal-ah an kaltir a, RB Leipzig player pawimawh Naby Keita leh Bernardo te chu Liverpool leh Brighton ten an chhuhsak bawk.
Champion inchuhna
Bayern Munich chu champion rinkai an la ni reng a, Niko Kovac-a system bel turin hun a duh ang em tih chu zawhna a ni.
Schalke leh Borussia Dortmund ten player ṭha an chan avangin naupangah an innghah a ṭul dawn. Dortmund midfielder kum 19 mi Christian Pulisic chu a vanglai hmang ṭan tura beisei a ni a, Schalke midfielder Weston McKennie pawh kum 19 mi chauh ni chungin season liam ta khan match 22 zet a khel tawh a ni.
Champion lai Bavarians elpui tur berah Schalke leh Dortmund te hi an ngaih theih a; Champions League khel tur zawnnaah erawh Hoffenheim leh RB Leipzig ten player an chan nasat avangin Borussia Monchengladbach, Hertha Berlin emaw Werder Bremen tan kawng a inhawng thei ang.
Zanin Inkhel Tur
Hertha BSC 7:00 PM Nürnberg
Werder Bremen 7:00 PM Hannover 96
Freiburg 7:00 PM Eintracht Frankfurt
Wolfsburg 7:00 PM Schalke 04
Fortuna Düsseldorf 7:00 PM Augsburg
Borussia M'gladbach 10:00 PM Bayer Leverkusen
August 27, Pathianni
Mainz 05 7:00 PM Stuttgart
Borussia Dortmund 9:30 PM RB Leipzig