US Open 2018 ; New York-ah tennis thiam rual fuan khawm dawn
Tennis season kal laia Grand Slam hnuhnung ber tur US Open 2018 chu August 27, Thawhṭanni aṭangin main draw khelh ṭan a ni dawn a, mipa player ṭha rual pali Roger Federer, Rafael Nadal, Novak Djokovic leh Andy Murray te an inlan kim dawn - 'Big Four' tia sawi ṭhin zinga champion tura rinkai fal nalh an awm bik lo.
Inkhel tur pawh a ni tawh a, American star pahnih Venus leh Serena Williams te chu an chak chho zel a nih chuan third round-ah an intawng dawn, champion lai Sloane Stephens leh world number 1 Simona Halep te pawh semifinal-a intawng thei tur an ni; mipa chauh ni loin hmeichhe lam pawh an inel tawk hle tura ngaih a ni.
A hmuhnawm dawn
Champion lai Rafael Nadal-a'n a nomawi kawl lai humhim turin New York an pan dawn a, Spanish tlangval Nadal hian a match hmasa berah a hnampui David Ferrer a hmachhawn ang, seeded pahnihna Federer chu Yoshihito Nishioka nen an inkhel thung ang. Swiss star leh Japanese tlangval te hi an vawi khat intawnna tur a ni dawn.
Tennis legend pahnih Nadal leh Federer te hi an chak zel a nih pawhin final hma chuan an inhmachhawn thei dawn lo, player pahnihte hi inelna hrang hrangah inkhel tam tawh viau mah se Flushing Meadows-ah chuan an la inhmachhawn ngai lo! Grand Slam danga an intawn tawhnaah chuan Nadal hian 6-3 in record a nei ṭha zawk.
Kar hmasa lawka Cincinnati Open nomawi chawitu Djokovic chuan first round-ah Marton Fucsovics nen an inkhel ang. Grand Slam vawi thum champion tawh Stan Wawrinka chu wildcard pek a ni a, ani hian seeded pariatna Grigor Dimitrov a hmachhawn dawn; player pahnihte hi Wimbledon first round-ah khan an intawng tawh bawk a, Swiss tlangvalin hnehna a chang.
Hliam vanga kum khat deuh thaw inkhel mumal tawh lo Andy Murray erawh a vanneiah a ngaih theih. World number 1 hlui Murray hi tunah chuan number 378 a ni mek a, match hmasa berah James Duckworth nen an inkhel dawn - player langsar pali zinga mi nen round hmasa lamah an inkhel dawn lo.
Amaherawhchu, kum 31 mi Murray tan kawng a awlsam dawn tihna erawh a ni ngawt chuang lo, seeded pathumna Juan Martin del Potro nen third round-ah an inkhel thei dawn. Argentine tlangval Del Potro hi US khawpuiah chuan mipui ṭan rawn a ni a, khawtual mi ni lo mah se fans ngah berte zinga mi a ni.
US Open hi
1881 aṭanga khelh ṭan US Open hi a vawi 138-na tur chiah a ni a, kuminah hian court hrang hrang 22 zetah khelh tur niin, mipui 22,547 ṭhut theihna Arthur Ashe Stadium chu an khelhna hmun pui ber tur a ni. Stadium hi a chung khuhna siam a ni tawh a, hei vang hian match pawimawh bik an khelh ho chu ruah surin a ti buai lo ang.
Tun hma chuan US Open hi grass leh hard court-ah khelh a ni tawh ṭhin, 1978 aṭang erawh chuan hard court-ah khelh a ni thung. Grand Slam dang pathumah chuan set hnuhnung hnuhnung bera tie break an chhiar dan leh a hmasa lam a inang lo, set hmasaah chuan 6-6 a nih hnuah point ruk an hmuh tlin thleng, point hniha an san zawk chuan set an la mai ṭhin.
US Open-eh erawh a danglam, Grand Slam dang pathuma set hnuhnung ber an khelh angin set zawng zawng khelh vek a ni. Player pahnihte 6-6 a nih tawh chuan, game hnih la zawm hmasa thei zawkin set an la chauh ṭhin a ni - inhnehtawk taka inkhelah chuan hun a duh rei ṭhin hle.
Kuminah hian singles champion chuan Rs 25,97,21,500 bakah ranking point 2,000 an hmuh belh dawn, inelna lian dang ang bawkin mipa leh hmeichhe champion lawmman dawn zat hi a inzat. Mipa leh hmeichhe doubles bakah mixed doubles a awm dawn bawk a, junior leh rualbanlo tan inelna hran siam a ni bawk ang.
2006 aṭang khan US Open-ah hian khawl hmanga a dik leh dik loh enna 'Hawk-Eye' hman ṭan a ni. Player ten an ball vuak a dik ngeia an ngaih ni si, dik lo a an pawm sak chu umpire hnenah ennawn turin an ngen 'challenge' thei. Set tinah vawi thum zel neih theih a ni a, tie break khelh a nih chuan vawi khat pek belh an ni bawk.
Australian Open, US Open leh Wimbledon-ah te chuan Hawk-Eye hi hman vek a ni tawh a, clay court-a khelh awmchhun French Open-ah erawh hman a la ni lo. Clay-ah chuan ball sawhna lai hriat theih a ni a, player ten ennawn tura an ngen a nih chuan umpire chu a ṭhutna aṭanga chhukin a zuk enfiah mai ṭhin a ni.