Mizoram Under 15 League ; AFC Academy khingpui tur Chanmari FC

Tualchhung football-a club inel pahnih Aizawl FC Academy leh Chanmari FC te vawiin chawhma dar 10:30 hian Mizoram Under 15 League-ah an inhmachhawn dawn. AFC Academy hian point kua hmuin pahnihna an ni a, Chanmari FC hian point khat chauha an phak loh avangin an inkhel tur hi a pawimawh.

Under 15 League hi Rajiv Gandhi Stadium, Mualpuiah khelh ṭhin a ni a, inelnaah hian team 10 an tel. Aizawl FC Academy hian match hnuhnung berah team ṭha bera ngai Tata Trusts COE an hneh a, an phur vanglai takin M28 Academy nenna inhnehtawk Chanmari FC nen an inhmachhawn ang.

Inkhel dangah M28 Academy leh Kanan FC te an inkhel dawn a, an inthauhna hi point hnih chauh a nih avangin an inkhel result a zirin table a danglam thei ang. Armed Veng club FC Stonzz-in Kanan an hneh hnuah Bawngkawn GSA an hneh leh thei a nih chuan table sang lamah awmhmun an khuar thei ang.

Inkhel hnuhnung berah league Tata Trusts COE leh Siphur Venghlun FC te an inkhel dawn a, British coach Colm Toal hoten match hnih chhung chak hmel an hmuh tawh loh avangin Sihphir Venghlun tan fimkhur a ṭul dawn. Hemi hma chiah hian Aizawl Grassroots Center chuan point la hmu lo awmchhun Competitors for Christ an hmachhawn dawn a, hmahruaitu an nih chhunzawm theih a rinawm.