Bopanna leh Sharan ten gold vaw chhuak

Asian Games 2018 neih mekah nimin khan India tlangval pahnih Rohan Bopanna leh Divij Sharan te ṭangdun chuan tennis doubles huangah gold medal an vaw chhuak. He thu buatsaih lai thleng hian India chuan a pumpuiah gold paruk lain pasarihna dinhmun a luah mek.

Bopanna leh Sharan te hian minute 52 chhung lekin Kazakhstan tlangval Aleksander Bublik leh Denis Yevseyev te chu 6-3, 6-4 in an hneh. Bopanna te hian bul an ṭan fuh hle a, minute 20 pawh tling loah 4-1 a hma hruai fal nghalin, a tawp thlengin buaina lian tham an tawk zui lo.

2010 Asian Games-ah khan Somdev Devvarman leh Sanam Singh te ṭangdun chuan doubles-ah hian gold an lo la tawh a, anni hnuah chuan Bopanna leh Sharan te hi pakhatna ni thei hmasa ber an ni - he inelna bikah hian India chuan gold pali a la tawh.

Heena tan bronze

Indian shooter tawnhriat nei ṭha tawh tak Heena Sidhu chuan nimin khan women’s 10m air rifle-ah bronze medal a kap chhuak a. Jakabaring Shooting Range-ah Heena hian vawi thum chauh kah a awm tawh tihah point 10.8 a hmu a, mahse a dawt chiahah 9.6 a hmuh zui avangin medal sang zawk a dawng phak ta lo.

Qualifier lamah Heena hi a che ṭha tawk lo, 13-na leh 17-na dinhmun a luah. Inelna takah erawh a tawnhriat neih hnem a lang a, a pumpuiah 219.3 hmuin, pakhatna nen an inthlahna chu 0.1 chiah a ni.

Siami te inlan hun

Asian Games-ah India-in an beisei angin medal la hlawh chhuak hnem tawk lo mah se, hockey huangah erawh an mahni khing zo an la tawng lo - an khingpui apiang an sawp zel.

Mizo nula Lalremsiami Hmar telna hmeichhe team hian zanin dar 6:30-ah South Korea an hmachhawn leh dawn a, an match hmasa pahniha goal 29 khung thei India hi chak tura rinkai an ni; India hian goal an khung hnem bakah an mahni lamah a la lut miah lo.

Mipa team hian an match hmasa pahnihah goal 43 tehmeuh an khung thei a, nizan khan Japan nen an inkhel result kan hre hman lo. Japan bakah hian South Korea leh leh Sri Lanka te nen group match an la khel leh ang.

Hockey
India Hmeichhe Results & Fixtures
August 19, Pathianni
India 8 - 0 Indonesia
August 21, Thawhlehni
India 21 - 0 Kazakhstan
August 25, Inrinni
India 6:30 PM South Korea
August 27, Thawhṭanni
India 12:30 PM Thailand
India Mipa Results & Fixtures
August 20, ThawhṬanni
India 17 - 0 Indonesia
August 22, Nilaini
India 26 - 0 Hong Kong
August 24, Zirtawpni
India 6:30 PM Japan
August 26, Pathianni
India 4:30 PM South Korea
August 28, Thawhlehni
India 2:30 PM Sri Lanka