Emirates Stadium-ah Wilshere kir dawn

Zanin dar 7:30 hian Emirates Stadium-ah Arsenal leh West Ham an inkhel dawn a, Gunners fa chuam ni ṭhin Jack Wilshere chu amah chher chhuaktu club hmachhawn turin a kir dawn.

England international Wilshere hi player beisei awm tak ni ṭhin a ni. Mahse, hliam a neih ngun avangin beisei a phak zui lo, manager thar Unai Emery a rawn lan hnuah hmun nghet chan a beiseiawm loh a, a inkhelh tam theihna tur nia a ngaih Hammers a pan.

Arsenal manager Emery chuan, "A chhuah hma khan minute 15 chhung kan inbia, fans lam ṭan rawn leh ngainat a ni tih ka hria in a career ka zah sak hle. Chutihrualin inkhel reng turin thu ka thiam nghal thei lo a, chhuah a thlang ta a ni.

"Zaninah pawh ṭha takin kan lo dawngsawng dawn, ṭha taka khel tur pawhin ka duhsak hle. Mahse, keini lam pawhin hnehna chan tumin kan bei dawn a ni," tiin Premier League-a a point hmasa ber hmuh a tum ruh hle.

Arsene Wenger-a chhuah hnuah Arsenal in league bikah chak ni hmel an la hmu lo, champion lai Manchester City leh Chelsea lakah an tlawm a, zanina London Derby an khelh turah point an hmu lo leh a nih chuan Spanish manager tan a luhai thlak khawp ang.

Sevilla manager thar kaihhruaina hnuiah Gunners hian Blues lakah match ṭha tak an khel a, goal khung theihna tur hun pawh an insiam hnem. Chutihrualin an tlarhnung a phui loh bakah goal khung theihna tura ngaih an hlah hnem malh malh hle.

Tlarhma laiah Pierre-Emerick Aubameyang chiah dah ṭhin niin, Gabon international hian Dortmund lam a goal khung theihna ang kha a la lantir rih lo. West Ham lakah striker pahnih a hmang dawn em tih zawhna chhangin Emery chuan, "Dawn rih lo, tunah chuan inkhel kan thunun phawt a ngai. Tlarhma leh a hnung lam inbuk tawk taka siam chhuah hi kan tum phawt tur a ni," a ti. Aubameyang nge Alexandre Lacazette zawk lut tur erawh a sawi lang lo.