Chelsea-in Pep-a ho Man City thiamzia an hmu

Inrinni zan khan Chelsea-in Premier League champion Manchester City hmachhawn turin Etihad Stadium-ah an lenglut a, Thomas Tuchel-a hoten Pep Guardiola hote thiamzia an hmu. Man City hi Kevin de Bruyne-a goal mawi hmangin 1-0 in an chak.

Minute 90 chhunga Man City-in inkhel an thunun dan hi goal khat lekin a sawifiah lo a, inkhel thliritute tana mak khawpin Champions League final rematch-ah Pep-a hoten inkhel an thunun a ni.

KDB leh City an thiam
Man City leh Chelsea inkhel result hian champion a hril theih avangin inkhel pawimawh bik a ni a, team pahnihin ṭan phat aṭangin sa huai an ser ve ve.

Ṭhat dan bera inrem ve veah Pep-a'n a naute a rem fuh zawk a, Chelsea-in first half-ah goal attempt pawh an nei lo. Man City erawh a khat mawi tawkin chance an nei a, John Stones leh KDB ten Edouard Mendy awm loh vanga goal veng Kepa Arrizabalaga tan hna an siam.

Chance ṭha ber erawh Mateo Kovacic pass sual vanga thleng a ni a, pound maktaduai 100 man Jack Grealish-a'n keeper man to ber Kepa chauh a hmachhawn chungin a pet goal lo.

Second half ṭantirhah pawh KDB leh Raheem Sterling ten Chelsea tlarhnung an inrumṭhaih nghal a, chutihrualin Thomas Tuchel pawhin halftime a hmang ṭangkai tih a lang.

Blues-in chance ṭha an nei a, Kovacic a ball pek chu Romelu Lukaku tan ball duhthusam ni mah se Belgian striker ball pet hi keeper Ederson-a'n a dansak. City keeper save per hi Hakim Ziyech-a'n a hmang ṭangkai zui lo bawk.

Minute 70-naah goal a lut a, player thiam bik Kevin De Bruyne-a'n theihna a neih san bik vang liau liauin a khung. Belgian midfielder KDB hi N'Golo Kante-a'n a tackle tlu zo lo a, box pawn aṭangin mawi zetin a pet goal.

Goal khat luh hnuah pawh Man City bawkin chance ṭha an ngah a, Phil Foden leh Grealish ten an hun ṭha an hmang ṭangkai lo. Pep-a hoten inkhel an thunun a, an phu ang ngeiin point thum an hlawh chhuak.

3-2 a ni chiah
Nikum January thlaa Thomas Tuchel-a'n Chelsea a enkawl ṭan aṭang khan German manager leh Pep Guardiola te hi vawi nga an inhmachhawn tawh a, Tuchel hian a hmasa pathumah hnehna chang mah se a hnuhnung pahnihah Guardiola-a'n hnehna a chang.

Tuchel-a hian FA Cup semifinal, Premier League leh Champions League final-ah Guardiola hote hi a hneh. Spanish manager hian tun season Premier League-ah 1-0 ve vein hnehna a chang thung. An record thlirin 3-2 in Tuchel-a'n hma hruai mah se khelmuala chet dan thlir erawh chuan Guardiola a chungnung zawkah a ngaih theih a, chutihrualin German manager hi Guardiola-a'n nomawi a chawi châk ber Champions League a chawi theih lohna chhan a ni tho tho.

Champion a chiang?
Premier League-ah club ṭha rual leh manager ṭha rual intlar ṭhut mah se Pep Guardiola kaihhruai Manchester City an chungnung a, tun season-ah pawh champion turin an dinhmun a ṭha leh ta hle. Man City hian match 22-ah point 56 an hmu a, khelh zat inangah Chelsea aiin point 13 in an sang tawh zawk.

Man City tibuai thei tur bera ngaih Liverpool-in nizan khan Brentford an mikhual a, result kan hre hman lo. Reds hian Anfield-ah hnehna chang ta reng pawh ni se Man City umphak erawh a harsa tawh ang. Chelsea manager Thomas Tuchel chuan, "Man City hi an khel ṭha ringawt lo a, beisei phak bakin an che ṭha a ni. Tihsual an nei tlem a, inkhel inhnehtawkah hnehna an chang a, an vannei tel a, chutihrualin thil tak tak hi kan pawm mai a ṭul," tiin Man City a fak a, season tawp a la tawp loh avangin beiseina an la neih thu a sawi bawk.

Man City manager Pep Guardiola chuan, "Mi ṭhenkhat chuan champion a chiang an ti ang. Ka player-te erawh a la chiang lo tih an hria. January thlaah champion a chiang lo. Chutihrualin match 12 chhung kan chak zawn a, point 36 ngawt kan hmuh avangin ka naute ka fak. January chauh a ni a, Premier League chauh ni loin Champions League leh FA Cup-ah nomawi beisei tur a la awm," tiin khelh hmabak an ngah thu a sawi ve thung.

January 14, Zirtawpni
Brighton 1- 1 Crystal Palace
BRI : Joachim Andersen 87' (OG)
CRY : Conor Gallagher 69'

January 15, Inrinni
Burnley PSTP Leicester City
Manchester City 1 - 0 Chelsea
MNC : Kevin de Bruyne 70'
Newcastle United 1 - 1 Watford
NEW : Allan Saint-Maximim 49'
WAT : Joao Pedro 87'
Norwich City 2 - 1 Everton
NOR : Michael Keane 16' (OG); Adam Idah 18'
EVE : Richarlison 60'
Wolves 3 - 1 Southampton
WOL : Raul Jimenez 37'; Conor Coady 59'; Adama Traore 90+1'
SOU : James Ward-Prowse 84'
Aston Villa 2 - 2 Manchester United
AST : Jacob Ramsey 77'; Philippe Coutinho 81'
MNU : Bruno Fernandes 6', 67'