Thiam loh chang 'Djokovic'

Australian Open a khelh hram theih dan ngaihtuah ngial mah se Novak Djokovic tan kawngkhar khar a ni. Federal Court chuan Serbian star visa chu a tih nunsak nawn ta lo a, hreh tak chungin Melbourne khawpui a chhuahsan a ngai.

Vawiin aṭangin tennis season khat chhunga Grand Slam hmasa ber Australian Open hi khelh ṭan a ni dawn a, champion lai leh seeded pakhatna pek ni tawh Djokovic tel loa an khelh a ngai dawn - Serbian star ṭantute tan chuan a khawharthlak khawp ang.

World number 1 Djokovic chuan a chunga thil thleng hi a pawm a, chutihrualin pawi a tih takzet thu a sawi tel bawk. Novak chuan, "Ka chunga rorelna thu chhuak hi pawi ka ti a, chutihrualin ka pawm thiam chu a ngai bawk.

"Tournament khel tur player, official leh thawktute zawng zawng duhsakna ka hlan. Hun hrehawm ka tawh laia min thlawp tlattu ka chhungkua, ṭhiante, team leh fans chungah lawmthu ka sawi, anni hi ka chakna hnar an ni," tiin a sawi.

Thiam loh chang
Australian Open khel tur tan Covid-19 laka invenna lak ngei a ngai. Vaccine la lo pawh an lak loh chhanah hian, taksa hriselna lam thil vanga ngaihhnathiam an ni tur a ni, tih a ni. Vaccine la lo Djokovic tan tih luih theih a ni ta lo.

Djokovic hian vaccine la lo chungin Australia ram hi a thleng thei tho a, mahse Melbourne a thlen rualin khung hran nghal a ni. Federal Court-ah an zualko a, a visa hi tih nunsak leh ni mah se immigration minister chuan a thuneihna hmangin visa hi a hnawlsak.

Federal Court-ah Djokovic hi a kal nawn a, nimin khan insawifiahna hnuhnung neih niin thutlukna an siam nghal a, minister-in visa a hnawlsakna hi a ding chang ta zawk a ni. Eng chen nge a nghawng dawn erawh hriat a la ni lo.

A nghawng
Visa hi hnawlsak a nih takah chuan a nghawng zinga pakhat chu, kum thum chhung Australia ram tlawh theih lo tura hrem theih a ni. Djokovic chungchangah he dan hi an hmang tlang dawn em tih erawh puan a la ni lo.

Djokovic hi kum 34 mi a ni tawh a, kum thum chhung atan an hrem zui a nih ngat chuan atan Australian Open a tawp zui nghal tia sawi theih a ni ang. Zahngaihna an lantir a nih erawh chuan kawng hawnsak leh theih a la ni ang.

Grand Slam dan angin Novak a awm loh takah chuan a hmun ruak luahtu an awm a ngai. Qualifying round-a chak lo zinga a vannei ber Salvatore Caruso a inlan thei dawn, world number 150 hian Miomir Kecmanovic a hmachhawn dawn.