Test captain aṭangin Kohli a inhnukdawk

Virat Kohli chuan Inrinni khan India Test captain aṭanga a inhnuh­dawh thu South Africa an hneh loh zawhah a puang. Kohli kaihhruai Men in Blue hian South Africa nen Test match vawi thum an khelhah a hmasa berah hnehna chang mah se a hnuhnung pahnihah an chak loh avangin series-ah 2-1 in tlawm.

Kum 33 mi Kohli hi nikum T20 Cricket World Cup zawh khan T20 captain aṭangin a inhnukdawk tawh a, hemi hnu hian ODI captain-ah an ruat zui lo. Player angin Kohli hian sulhnu ṭha tak a nei a, a captain-na hnuaiah erawh India hi ICC hnuaia inelna lianah a champion pui lo.

Kohli chuan, "Team-in kawng dik a zawh theih nan kum sarih chhung rim takin kan thawk. Captain hna hi rinawmna takin kan thawk a, hei bak chu India tana pek theih ka nei tawh lo. Engkimin tawp hun a nei a, tunah chuan Test captain aṭanga chawlh a hun ta a ni," tiin a chawlh thu a puang.

India hian Kohli captain-na hnuaiah Test match 68 an khel a, match 40-ah hnehna a chang. Test captain history-a record nei ṭha ber palina a ni a, nikum khan World Test Championship hmasa berah final thleng mah se New Zealand lakah an chak lo.