Arsenal inkhelh hun an sawn

North London Derby chu Arsenal lamin a khelh hun sawn an dil anga sawnsak an ni a, an khingpui tur Tottenham Hotspur erawhin inkhelh hun sawn hi an lawm lo hle - club pahnih ngaihdan leh duhdan a inang thei lo.

Covid-19 chungchanga Premier League inkaihhruaina danah chuan, player inkhel tur 13 an nei tling lo a nih chuan inkhelh hun sawn theih a ni a, hetah hian goalkeeper chhiar tel a ni ve lo thung.

Gunners hian Africa Cup of Nations khelh vangin Thomas Partey, Mohamed Elneny, Pierre-Emerick Aubameyang leh Nicolas Pepe te an chân mek. Liverpool an hmachhawn ṭumin Cedric Soares, Bukayo Saka leh Calum Chambers ten hliam an tuar.

Reds lakah Granit Xhaka hnawhchhuah niin hrem a tuar, midfielder Martin Odegaard chu hripui kai hnaivai ber a ni. Manager Mikel Arteta-a'n a theih chhung chuan inkhelh an duh thu sawi mah se, an player neihin a daih ngang ta bik lo.

Arsenal hian Premier League hmahruaitu Manchester City aiin match hnihin an khel tlem ta chiah. Tottenham erawh City aia an khelh tlemna match li ngawt a ni tawh a, season chawhnu lamah chawpchilh taka an khelh a ngaih dawn avangin inkhelh hun sawn hi an tan a pawi thei a ni.