Mohamed Salah hoin Egypt an chak
Nigeria laka 1-0 a an tlawm hnuin Egypt an chak ve ta a, Mohamed Salah goal khung hmangin Guinea-Bissau chu 1-0 in an hneh a, last 16 luh beiseina an chhi nung thar ve leh ta.
Group D inkhel dangah Nigeria an chak bawk a, Sudan chu 3-1 in an hneh. Nigeria tan Samuel Chukwueze, Taiwo Awoniyi leh Moses Simon ten goal khat ṭheuh an khung a, Sudan tana Walieldin Khedr goal khungin awmzia a nei phak lo.
Nigeria-in hnehna an chan avangin AFCON last 16 an lut chiang ta bawk a, Zirtawpni zan khan Morocco chuan 2-0 a Comoros hnehin a thiam 16 zingah an hming an ziak ve ta bawk.
Zirtawpni zana group C inkhel dangah Ghana chuan 1-1 in Gabon an inhnehtawkpui a, last 16 lut turin an match tawp berah Comoros an hneh ngei a ngai dawn. Senegal an chak zo bik lo a, Guinea nen 0-0 in an inhnehtawk - team pahnih hian group B-ah point li ve ve an nei a, last 16 lut turin an dinhmun a ṭha hle.
Hei le, Salah
Best FIFA Football Awards zaninah sem a ni dawn a, Mohamed Salah chuan a kalna hmun apiangah innghahna tlak a ni zel tih min hriat nawn tir leh ta.
Guinea-Bissau lakah Salah hian minute 69-naah inkhela goal awmchhun a khung a, Guinea-Bissau tan Mama Balde chuan si phurh a sutah inngai mah se a goal khung pawmsak a ni lo a, 1-0 in Egypt an chak.
Hun pek belhah Moreto Cassama chuan half-volley hmangin si phurh sutna remchang a nei bawk a, mahse, Egypt keeper Mohamed El Shenawy chuan ṭha zetin a dansak.
AFCON champion ngun ber Egypt hian Nilaini zan dar 12:30-ah Sudan an hmachhawn dawn a, last 16 lut turin an tan draw result a tawk ang.
Morocco an chak
Comoros laka chak turin Morocco-in harsatna an tawk lo a, Selim Amallah leh Zakaria Aboukhlal goal khung hmangin 2-0 in hnehna an chang.
Morocco-in an match hmasa pahniha hnehna an chan avangin last 16 an lut fel der a, mahse, an result-ah lawm mah se an khelh danah erawh champion an tum chuan insiamṭhat an mamawh ang.
Sevilla striker chhuanvawr Youssef En-Nesyri chuan Morocco tan penalty hmangin a hming chherna remchang nei mah se a chhawr thei lo a, goal a khung lo.
Comoros tan keeper Salim Ben Boina chu fak tlak a ni a, French fourth division club FC Martigues tana khel keeper hian Morocco goal khung ngei tura ngaih chu vawi tam a dang.
Ghana an buai
Minute 18-na leka Andre Ayew goal hmangin Ghana-in chak an beisei a, mahse, hun tawp nan minute hnih chauh a awm tawh tihah Jim Allevinah chuan a chhanglet a, 1-1 in an inhnehtawk.
Allevinah goal khung hi sawisel theih tak a nih avangin inkhelh zawhah buaina a chhuak a, Ghana an lawm lo hle - Ghana forward Daniel-Kofi Kyereh chu Gabon goal hnaih lamah a tlu. Gabon lamin throw-in an nei zui a, hemi aṭanga ball kal chu Allevinah hian goal-ah a chantir.
Hun a tawp zui a, Gabon-in chak an lawm laiin buaina a chhuak. Ghana substitute Benjamin Tetteh chu buainaah a lo phur fal deuh a, match thum khel thei lo turin hrem zui a ni.
Gabon hian lung lam fel lo avangin an captain Pierre-Emerick Aubameyang an chhawr thei lo a, mahse, Gabon medical team lam betu Arsenal doctor-te chuan an player dinhmun hi a ngaihtuahawm loh thu an sawi.