Lewy-a'n Bundesliga goal 300 a khung tling ta
Bundesliga hmahruaitu Bayern Munich-in Inrinni zan khan FC Cologne 4-0 in an hneh. Bavarians tan hian Robert Lewandowski-a'n hattrick a siam a, Polish striker hian Bundesliga-ah goal 300 a khung tling.
Bavarians inkhelh hma hian Borussia Dortmund-in Freiburg 5-1 in an sawp a, an inthlauhna hi point thum chauh a ni hman. Amaherawhchu Julian Nagelsmann-a hote an buai phah lo a, Cologne an sawp avangin Dortmund nena an inthlauhna chu point ruk a ni leh ta a ni.
Lewy a class
Covid-19 vanga buai Bayern Munich-in ziaawm lam an pan zel a, Cologne hmachhawn turin team ṭha pangngai an chhawp chhuak thei tawh. Bavarians hian goal pawh an khung hmaa a, minute kuana lekah Thomas Muller-a ball pek chu Lewandowski-a'n chiang takin a pet goal.
Assistant referee-in Lewy goal hi offiside-ah ngai mah se VAR hmanga ennawn a nih hnuah Polish striker hian offside trap-ah a tang lo tih hmuh niin goal-ah pawm a ni. Goal hnihna class a sang a, French midfielder Corentin Tolisso-a'n Muller hnen aṭanga a ball hmuh chu mawi zetin a khung.
Cologne-in Mark Uth hmangin siphurh an sut ṭhenah an ngai a, VAR hmanga enlet hnuah pawm a ni lo. Second half ṭantirhah Lewy-a'n a chance ṭha neih hmasak khung lo mah se striker ṭha bik hi dan reng theih a ni lo.
Bayern striker hian minute 62-naah goal hnihna a khung a, minute 74-naah Lewy hian hattrick siamna goal a khung zui. Cologne hian chance ṭha an neih ve tho avangin team pahnih inthlau taka an lanna chhanah Lewandowski a ngaih theih.
Goal 300
Germany legend Gerd Muller-a'n Bundesliga-ah goal 365 a khung a, Bayern legend hnua Bundesliga-a goal 300 khung tling leh thei hmasa ber chu Bayern legend tho Lewandowski a ni.
Lewandowski hian Borussia Dortmund tan season li chungin goal 74 a khung a, Bayern Munich-ah goal khung hna chhunzawmin season riat chhungin 226 goal a khung.
Polish striker hian tun season-ah goal 23 a khung tawh a, amah hnaih bertu Patrick Shick-a'n goal 18 a khung. Borussia Dortmund chhuanvawr Erling Haaland-a'n goal 15 a khung a, hei hian Lewandowski ropuizia a pholang.