Juve tan point thum

Paulo Dybala leh Weston McKennie te goal hmangin Juventus chuan Serie A inkhelah Udinese 2-0 in an hneh a, tun hnaia insiamṭha chho mek Massimiliano Allegri naute hian Inrinni zan inkhelah point thum hlu tak an hlawh chhuak.

Goal a khung hnuah Dybala hian nidanga a lawm ṭhin dan ang lo deuhin a ti, stadium kil khata club director awmna lam chu a melh, a contract chungchang a rang lama chingfel tura a duhzia lantirna a ni.

Argentina international hian tun season tawp thleng daih bak Old Lady tan contract a nei tawh lo, a pawtsei lo a nih chuan season tawpah a thlawnin a duh lam a pan thei mai dawn tihna a ni a, Italian club hian chelh tumin hma an la mek.

Juve manager Allegri chuan, "Kan khelh dan kha a lawmawm, pawng tawng nawr buan buan ringawt loin a hun taka beih dan kan hria. Paulo hi player ṭha bik a ni a, goal pawimawh pawh a khung thei, hun rei zawk kan hnena a cham chhunzawm kan beisei," a ti.