PSG chakna chu Kylian Mbappe

Paris St-Germain chuan kawng dik an zawh leh ta. Kylian Mbappe leh Thilo Kehrer te goal hmangin an mikhual Brest 2-0 in an hneh. Paris club hian Ligue 1 table-ah point 11 zetin hma an hruai fal leh thei ta a ni.

Zirtawpni zan inkhelah PSG hian Lionel Messi leh Neymar te an chhawr thei lo a, an player ṭha pahnih awm lo mah se Mbappe a awm miau avangin buaina tur an nei lo - France inter­national hian season kal lai inelna hrang hrangah goal 19 a khung tling ta.

PSG player zingah tun hnai khan Covid-19 kai pali an awm, an zingah Messi pawh a tel. Argentina captain hian hripui a kai avangin tun hnaiah match thum a khel thei lo. Achraf Hakimi leh Idrissa Gueye ten Africa Cup of Nations an khel bawk.

Mauricio Pochettino-a'n a duh ang thlapin a naute a rem thei bik lo a, chutihrualin an squad a chhah miau avangin harsatna lian tham an tawk lo. Hun tawp dawna Sergio Ramos inlan thei chu chanchin lawmawm lam a ni bawk ang.

PSG manager Poch chuan, "Inkhel entu an awm mumal theih loh avang­in Parc des Princes a reh hle a, a khawhar thlak takzet. A pawimawh ber point thum kan hmuh theih avang erawh chuan a lawm­awm hle, eng inkhel pawh ni se chak hi a pawimawh," tiin a sawi.