Best FIFA Awards 2021 ; A hun a thleng ta - Tu nge chawimawiin awm dawn?

Football khawvela mimal chawimawina ngaihhlut hlawh ber pawl Best FIFA Awards 2021 chu zaninah semchhuah a ni dawn ta a, tuin nge chawimawina dawng dawn? tiin khawvelin nghakhlel takin a thlir mek.

Zanin dar 11:30-ah Best FIFA Awards 2021 inkhawm hi ṭan a ni dawn a, YouTube, facebook, twitter leh fifa.com ah te en theihin pek chhuah a ni dawn a, a nghahhlelhawm ta hle.

Switzerland khawpui lar Zurich-a FIFA headquarters-ah award semchhuahna hi neih tur a ni dawn a, hri leng avangin award sem inkhawm hi online kaltlanga neih tur a ni ang.

Ṭum dang ang thoin Best Men's Player dawng tur chu ngaihven hlawh ber a ni a, he chawimawina dawng thei tur hian Robert Lewandowski, Mohamed Salah leh Lionel Messi te hming chhawpchhuah a ni.

LewanGOALski
Best FIFA Men’s Player ni lai chu Robert Lewandowski a ni a, Bayern Munich striker hian he chawimawina dawn nawn hi a beisei dawn - "Ka dawn tawh aiin ka dawn leh tur ka ngaihtuah zawk," tiin amah ngeiin a sawi tlat.

Poland captain hian World Cup qualifier-ah match riat khelin goal riat a khung a, assist vawi li a nei bawk a, Poland-in Lewy nei lo se World Cup playoff takngial pawh an thleng kher lo mai thei.

Season li chhung chu Bundesliga-ah a zawnin top scorer a ni tawh a, hetiang ang ti thei player hi an la awm ngai lo. 2020-21 season-ah khan league-ah goal 41 khungin kum 49 chhunga Gerd Muller (41 goals) record lo ding tawh chu a khum.

Kum 33 mi forward hian season hmasa khan Bundesliga, UEFA Super Cup, DFL Super Cup leh FIFA Club World Cup nomawi a chawi a, tun season-ah match 26 aṭangin goal 34 a khung leh der tawh!

A hming Salah
Season hmasaah Liverpool-in nomawi chawi an nei miah lo a, hei hian Salah buk a rih tur angin a ti rit lo ang tih a chiang. Mahse, Egyptian forward hian, "Mipui ngaihdan a pawimawh ber a, mahse, keima thinlungah chuan khawvela ṭha ber ka ni," a ti ngam ngat.

Reds forward hi Premier League-a season thum, goal 20 khung tling ziah thei awmchhun a ni a, tun season-ah pawh inelna hrang hrangah match 26 khelin goal 23 a khung leh der tawh.

Kum 29 mi Salah hian Premier League-ah goal 113 a khung tawh a, African player zingah Premier League-a heti zat goal khung thei dang an la awm lo.

Egyptian King hming lem an pek striker hi an ramin AFCON an khelh theih nana player thawhhlawk a ni a, ram tan match 77-ah goal 46 a khung tawh.

Messi chu Messi
Sawiselna leh duh khawp lohna awm ve ṭhin bawk mah se Lionel Messi chu a thiam ngaiin a thiam reng a, kum 34 mi a ni tawh chungin khawvela footballer ṭha ber ni tura chhawpchhuah pathum zingah a la tel cheu.

Ballon d'Or chawimawina kawl mektu Messi buk tirittu chu Copa America nomawi a chawi kha a ni. Argentina captain hi squad tikimtu satliah a ni lo a, goal li khungin assist vawi nga a nei a, top scorer leh assist ngah ber a nih bakah best player atan thlan a ni.

Messi-a'n season hmasa khan Barcelona tan Copa del Rey nomawi chiah a chawi thung. Heti chung hian league-ah match 35 khelin goal 30 a khung a, La Liga-ah a zawna a vawi nga nan top scorer a ni a, a vawi riat nan top scorer chawimawina Pichichi trophy a dawng.

Argentine forward hian Paris Saint-Germain a pan hnuah league match 11 aṭangin goal khat chiah a khung a, assist vawi nga a nei thung. Champions League-ah match nga aṭangin goal nga a khung bawk.

A chhehvel
Best FIFA Awards hi Bengali nu hmelṭha Reshmin Chowdhury leh Tottenham Hotspur midfielder hlui Jermaine Jenas ten an host dawn a, an hnehsawh viauin a rinawm.

British-Bangladeshi sports journalist Reshmin hi BT Sport, talkSPORT leh BBC tan a thawk a, tun hi Best FIFA Football Awards a host-na hmasa ber tur a ni lo.

Kum 2020 khan host a lo ni tawh a, kum 2018 khan London khawpuiin Best FIFA Football Awards a thlen ṭumin green carpet presenter a lo ni tawh bawk - kum 44 mi a ni tawh.

England tana vawi 21 inlan tawh Jenas hi English football ngainatu zingah a mikhual lo. Newcastle United, Spurs leh Queens Park Rangers tan a lo khel tawh a, inkhelh a chawlhsan hnuah BBC leh BT Sport tan pundit hna a thawk.

Best FIFA Awards 2021 Nominee
Hming Ram/Club
Best women's player
Jennifer Hermoso (Spain/Barcelona)
Sam Kerr (Australia/Chelsea)
Alexia Putellas (Spain/Barcelona)
Best men's player
Robert Lewandowski Poland/Bayern Munich)
Lionel Messi (Argentina/Barcelona/Paris St-Germain)
Mohamed Salah (Egypt/Liverpool)
Best women's coach
Lluis Cortes (Spain/Barcelona)
Emma Hayes (England/Chelsea)
Sarina Wiegman (Netherlands/Dutch national team/
English national team)
Best men's coach
Pep Guardiola (Spain/Manchester City)
Roberto Mancini (Italy/Italian national team)
Thomas Tuchel (Germany/Chelsea)
Best women's goalkeeper
Ann-Katrin Berger (Germany/Chelsea)
Christiane Endler (Chile/Paris Saint-Germain/Lyon)
Stephanie Labbe (Canada/FC Rosengard/Paris Saint-Germain)
Best men's goalkeeper
Gianluigi Donnarumma (Italy/AC Milan/Paris Saint-Germain)
Edouard Mendy (Senegal/Chelsea)
Manuel Neuer (Germany/Bayern Munich)
FIFA Puskas Award
Erik Lamela Tottenham (v Arsenal, 14 March)
Patrik Schick Czech Republic (v Scotland, 14 June)
Mehdi Taremi Porto (v Chelsea, 13 April)