Chhara tan season a tawp

Zirtawpni zan Indian Super League inkhelah FC Goa leh NorthEast United te chu 1-1 in an inhnehtawk a, hliam vanga lakchhuah Rochharzela tan season a tawp zui.

Highlander tan Hernan Santana chuan minute hnihna lekah freekick mawi bik hmangin goal hmahruai a khung a, Goan club tan Airan Cabrera chuan minute 39-naah si phurh hi a sut.

NorthEast tan Rochharzela'n inkhel bul ṭan mah se minute 54-naah hliam vanga lakchhuah a ni a, R. Laldanmawia'n a thlak - minute 85-naah Lalkhawpuimawia (Mapuia) chu bench aṭanga luhtir a ni bawk.

Chhara chuan, "Ka khingkhang ruh a tliak a, vawiinah min zai dawn. Thla thum emaw thla li bawr vel chu chawlh ka ngai dawn a ni. Min lo ṭawngṭaipuitute chungah thinlung takin lawmthu ka sawi a, min lo ṭawngṭaipui zel turin ka sawm bawk a ni," tiin Vanglaini a hrilh.

Chhinga Veng tlangval Chhara hian tun season-ah league match 11 khel hmanin goal khat a khung a, khelmualah minute 408 hun a hmang hman.

Hetihlai hian Covid-19 in ISL pawh a kiansan hleithei lo a, Inrinni zana ATK Mohun Bagan leh Bengaluru inkhel tur bakah nizana Kerala Blasters leh Mumbai City inkhel tur chu a hun sawn a ni.