Man United lakah Coutinho a langsar nghal

Manchester United-in Bruno Fernandes hmangin Aston Villa lakah goal khung hmasa mah se Steven Gerrard-a'n bench aṭangin Philippe Coutinho a luhtir a, 'Little Magician' hian danglamna a thlen. Villa Park-ah Man United leh Villa 2-2 in an inhnehtawk.

Ralf Rangnick-a kaihhruai Man United-in Wolverhampton Wanderers laka an tlawm hnuah Aston Villa nen an inhnehtawk a, point ruk hmuh theihah point khat chauh an hlawhchhuah avangin match 20 khelh zawhah point 32 an hmu a, pasarihnaah an awm.

Man United hian Nilaini zan hian Brentford an lenchilh dawn a, January 22, Inrinniah West Ham an mikhual leh bawk ang.

Coutinho a vul
Manchester United-in FA Cup-a an hneh tawh Aston Villa hneh nawn thei turin bul an ṭan ṭha a, Bruno Fernandes hmangin minute rukna lekah an khung. Villa keeper Emiliano Martinez kap karah a lut, Argentine keeper tihsual liau liau a ni.

Cristiano Ronaldo tel lohna Man United-in Fernandes hmang bawkin minute 67-naah goal hnihna an khung a, Portuguese midfielder hian a pet ṭha takzet. Rangnick-a hote tan point thum a hnai a, mahse Gerrard-a'n bench aṭangin Barcelona aṭanga an hawh Coutinho a luhtir nghal.

Minute 77-naah Coutinho-a'n Man United tlarhnung hmaah a thiam thil a lantir a, Liverpool midfielder hlui ball pek chu Jacob Ramsey-a'n ṭha takin goal-ah a khung.

Villa an phur thar a, minute 81-naah Ramsey cross ṭha bik chu United defender Raphael Varane-a'n dang hman loin Coutinho-a'n goal ruakah a khung. Goal dang lut tawh loin 2-2 in inkhel a tawp.

£142m man
Barcelona-in Neymar thlak nana pound maktaduai 142 zet senga Liverpool aṭanga an lakluh Coutinho hian theihna sang tak a nei tih chu a chiang a, amaherawhchu Catalan club tan beisei a pha lo.

Kum 29 mi Coutinho chuan, "Premier League hian ka lung a len ṭhin. Bul ka ṭan ṭha a, a tawp thlengin beiseina kan nei bawk. Chet ṭhat leh chet chhiat chang a awm a, kha chu hun kal tawh a ni. Tunah chuan club leh manager thil tum ti hlawhtling turin ka rilru zawng zawng ka pe ang," tiin a sawi.

Gerrard pawhin Liverpool tana a khelhpui ṭhin Coutinho hi a dahsang hle. Villa manager chuan, "Coutinho hian tun hmaa a theihna ang kha phak lo pawh ni se, a han hnaih theih chuan kan chuan a ṭha tawk. Premier Legue-a player ṭha ber zinga mi a ni. Beiseina a nei sang a, keipawhin ka beisei sang. Chu chu atana pawimawh chu a ni. Thil thleng tawh a ngaihtuah a ṭul lo," tiin a player thar a fak.